Hamia kwenye habari

Hamia kwenye menyu ya pili

Mashahidi wa Yehova

Kiswahili

SEPTEMBA 24, 2014
ERITREA

Miaka Ishirini ya Ufungwa Nchini Eritrea—Hali Hii Itaendelea Hadi Lini?

Miaka Ishirini ya Ufungwa Nchini Eritrea—Hali Hii Itaendelea Hadi Lini?

Miaka ishirini iliyopita, wenye mamlaka nchini Eritrea waliwakamata vijana watatu na kuwafunga chini ya hali ngumu sana katika gereza la Sawa, ambako wamefungiwa hadi leo. Hawajafunguliwa mashtaka yoyote, wala hawajawahi kupewa nafasi ya kujitetea mbele ya mahakama. Kwa nini wamefungwa isivyo haki?

Paulos Eyassu, Negede Teklemariam, na Isaac Mogos ni Mashahidi wa Yehova na hivyo wamekataa kujihusisha na jeshi kwa sababu ya dhamiri na msimamo wao imara wa kidini. Iwapo wangefunguliwa mashtaka rasmi kwa sababu ya kukataa kutumika jeshini, basi wangepewa kifungo hususa. Wote watatu wametumia ujana wao wakiwa gerezani kwa kuwa sasa Paulos ana umri wa miaka 41, Negede ana miaka 40, na Isaac ana miaka 38. Wamenyimwa nafasi ya kuoa na kuwa na watoto, kuwategemeza wazazi wao wanaozeeka, na hata nafasi ya kuishi maisha yao kwa njia ambayo wangetaka. Pia, wamenyimwa nafasi ya kuabudu pamoja na waumini wenzao.

Septemba 24, 1994, siku ambayo Paulos, Negede, na Isaac walikamatwa, walitendewa kwa ukatili na hata wakateswa na wenye mamlaka katika gereza la Sawa. Hata hivyo, katika miaka ya karibuni, ukatili huo umekwisha, na kwa sababu ya azimio lao imara la kudumu wakiwa waaminifu kwa imani yao, wameheshimiwa sana na walinzi wa gereza.

Mashahidi wengine wafungwa katika hali ngumu sana

Mashahidi wa Yehova nchini Eritrea hukabili mateso makali sana kuliko sehemu nyingine yoyote ulimwenguni. Makala hii ilipokuwa ikiandikwa, kuna Mashahidi 73 walio gerezani, kutia ndani wanawake, watoto, na wazee. Wengi wamekabili hali ngumu sana za jangwani, wakikosa chakula chenye lishe, maji ya kutosha, na vilevile wakatendewa vibaya na maofisa wa gereza. Mashahidi wengine watatu wa kiume wamefungwa kwa zaidi ya miaka kumi katika gereza la Sawa, lakini Paulos, Negede, na Isaac ndio wamefungwa kwa muda mrefu zaidi kati ya Mashahidi wote nchini Eritrea.

Jamii ya kimataifa yaiomba Eritrea ikomeshe mateso ya kidini

Jamii ya kimataifa inajua vizuri sana jinsi Mashahidi wa Yehova na wengine wa dini ndogondogo wanavyoteswa nchini Eritrea.

  • Kila mwaka tangu mwaka wa 2004, Wizara ya Marekani ya Mambo ya Ndani imesema Eritrea ni “nchi inayotia wasiwasi mkubwa,” jambo linalomaanisha kwamba “serikali ya nchi [hiyo] inajihusisha katika au inaruhusu uhuru wa kidini uingiliwe vibaya kwa njia iliyopangwa, ya kuendelea, na ya wazi.”

  • Baraza la Haki za Kibinadamu la Umoja wa Mataifa limeeleza kwamba linasikitishwa sana na jinsi “wenye mamlaka nchini Eritrea wanavyovunja haki za kibinadamu za raia wao wenyewe.” Baraza hilo linaisihi nchi ya Eritrea “iheshimu haki ya kila mtu ya kuwa na uhuru . . . mawazo, dhamiri, na dini au imani.”

  • Ripoti ya Mwaka wa 2014 ya Tume ya Kimataifa ya Uhuru wa Kidini ya Marekani inasema hivi: “Uhuru wa kidini wa Mashahidi wa Yehova uko katika hali mbaya sana.”

  • Katika Ripoti ya Ulimwengu ya 2013, shirika la Human Rights Watch lilisema kwamba serikali ya Eritrea inaendelea kuwakamata, kuwafunga, na kuwatesa washiriki wa dini “zisizotambulika” na kwamba “Mashahidi wa Yehova ndio hasa wanaokandamizwa.”

  • Mnamo Desemba 2005 Tume ya Afrika kuhusu Haki za Binadamu na Watu ilipitisha azimio lenye kichwa Azimio Kuhusiana na Haki za Binadamu Nchini Eritrea, ambalo liliiomba Eritrea “ihakikishe kwamba kila wakati kuna haki ya mtu kusikilizwa mahakamani, watu wana uhuru wa kuwa na maoni na kujieleza, na pia wawe na haki ya kukutana kwa amani.”

Philip Brumley, mshauri mkuu wa Mashahidi wa Yehova katika mambo ya kisheria, alisema hivi kwa niaba ya Mashahidi wa Yehova ulimwenguni pote: “Tunatumaini sana kwamba serikali ya Eritrea itawaachilia Mashahidi wote waliofungwa, kutia ndani wanaume hawa watatu ambao wamefungwa kwa miaka 20, na kukomesha mateso ya waumini wenzetu.”