Eneo la Makumbusho la Ravensbrück limepanga maonyesho yenye kichwa “Wapigwa Marufuku na Kuteswa—Mashahidi wa Yehova Katika Kambi ya Mateso ya Ravensbrück na Katika Magereza ya GDR.” Maonyesho hayo yanaonyesha matatizo ambayo Mashahidi wa Yehova walikabili chini ya utawala wa Nazi (1933-1945) na Jamhuri ya Kidemokrasia ya Ujerumani (GDR au Ujerumani Mashariki; 1949-1990), kutia ndani Jamhuri ya Weimar (1918-1933). (Ona sanduku “Mateso na Matatizo ya Kisheria Chini ya Serikali Tatu za Ujerumani.”) Maonyesho hayo yalifunguliwa Jumapili, Aprili 22, 2018, kwenye Eneo la Makumbusho ya Kambi ya Mateso ya Ravensbrück katika jiji la Fürstenberg, Ujerumani. Katika mwaka wa 2019, maonyesho hayo yataonyeshwa pia katika majiji ya Ujerumani ya Erfurt, Rostock, kutia ndani jiji la Potsdam ambako jengo la bunge la jimbo la Brandenburg litatumiwa kwa ajili ya maonyesho hayo.

Simulizi la maisha la Adolf Graf, mmoja kati ya wale waliokabili “mateso maradufu”, limetiwa ndani ya maonyesho hayo.

Maonyesho hayo yataonyesha masimulizi ya maisha ya ndugu na dada 12 waliokabili “mateso maradufu,” kwa sababu ya waliteswa na Wanazi na pia na Wakomunisti wa GDR. Pia, maonyesho hayo yatatia ndani rekodi za sauti na barua za kuaga kutoka kwa Mashahidi waliohukumiwa kifo, na pia magazeti na hati nyingine za kipindi cha Wanazi zitasomwa. Maonyesho hayo yanakazia kwamba tofauti na makumi ya maelfu ya watu ambao walifungwa kwa sababu ya kabila lao, maoni yao ya kisiasa, au uhalifu, ndugu zetu walifungwa kwa sababu ya imani yao.

Wakati wa ufunguzi wa makumbusho hayo, mwanahistoria Dakt. Detlef Garbe alitoa hotuba akieleza hivi: “Tangu mwanzo, imani na uhakika usioyumbishwa, roho ya umoja, na msimamo thabiti wa Mashahidi wa Yehova uliwafanya wawe shabaha ya chuki ya askari wa Wanazi (SS) . . . . Uhakika wao katika ahadi ya Mungu ya wokovu na umoja wao ulioonekana wazi, uliwapa Mashahidi wa Yehova nguvu za kuendelea kuwa waaminifu kwa imani yao hata katika kambi za mateso.”

Hata leo, Mashahidi wa Yehova wanapokabili upinzani na kupigwa marufuku na serikali, kama nchini Urusi, wana uhakika kwamba Yehova ataendelea kuwategemeza.—Isaya 54:17.