Hamia kwenye habari

Mashahidi wenyeji wakiwangoja wajumbe katika Uwanja wa Kimataifa wa Bandaranaike.

DESEMBA 21, 2018
SRI LANKA

Sri Lanka Wafanya Kusanyiko Lao la Kwanza la Pekee

Sri Lanka Wafanya Kusanyiko Lao la Kwanza la Pekee

Maelfu ya Mashahidi wa Yehova kutoka nchi saba walijiunga na ndugu na dada zao nchini Sri Lanka kwa ajili ya kusanyiko la pekee, la kwanza nchini Sri Lanka. Kusanyiko la Pekee lenye kichwa, “Uwe Jasiri”! lilifanywa katika mji mkuu, Colombo, kuanzia Julai 6 hadi 8, 2018, katika Uwanja wa Taifa wa Michezo wa Sugathadasa. Kulikuwa na kilele cha wahudhuriaji 14,121. Mambo ya kupendeza katika kusanyiko hilo yalitia ndani hotuba zilizotolewa na mshiriki wa Baraza Linaloongoza, watu wengi zaidi kuwahi kubatizwa kwa wakati mmoja, na ukarimu wa pekee ulioonyeshwa na ndugu na dada wenyeji kwa wajumbe 3,500 hivi.

Matayarisho yalianza Septemba 2017 makutaniko nchini Sri Lanka yalipopewa taarifa kwamba kutakuwa na kusanyiko la pekee mwaka wa 2018. Zaidi ya mipango yote iliyohitaji kufanywa kwa ajili ya tukio hilo, uwanja ulihitaji kufanyiwa marekebisho makubwa na usafi. Kazi iliyohitaji kufanywa ilitia ndani kupaka rangi, kuondoa taka, kurekebisha viti vilivyovunjika, na kuziba mashimo yaliyokuwa barabarani. Majuma matatu kabla ya kusanyiko, mamia ya Mashahidi walifika ili kusaidia kumaliza kazi hiyo. Ofisa mmoja wa ulinzi alisema kwamba kazi hiyo ingefanywa kwa miaka minne ikiwa ingeachiwa wadumishaji wa uwanja, lakini akina ndugu waliimaliza katika muda huo mfupi.

Zaidi ya programu ya kiroho, kulikuwa na matembezi na utendaji mwingine uliopangwa kwa ajili ya kuonyesha utamaduni wa Sri Lanka. Mojawapo ya utendaji utakaokumbukwa ni sherehe iliyofanywa jioni ambayo ilihusisha kucheza na kuimba, pia ilitia ndani kikundi cha vijana Mashahidi wakiimba nyimbo za Ufalme.

Ashley Ferdinands, mwakilishi wa ofisi ya tawi nchini Sri Lanka, alisema hivi: “Kusanyiko hili la pekee limekuwa zawadi kwelikweli kwa ndugu na dada nchini kwetu na lilikuwa pendeleo kuwa na wajumbe wengi hivyo. Tunathamini sana msaada wa wajitoleaji wengi waliofanikisha kusanyiko hili. Bila shaka, sifa zimwendee Baba yetu wa mbinguni ambaye ndiye chanzo cha zawadi zote njema.”—Yakobo 1:17.

Eneo la kusanyiko liligawanywa katika lugha nne, Kiingereza (hapa), Sinhala, Lugha ya Ishara ya Sri Lanka, na Tamil.

Ndugu Anthony Morris wa Baraza Linaloongoza alimalizia programu ya kila siku.

Waliobatizwa walikuwa watu 273.

Ndugu waliwakaribisha wanahabari kwa ajili ya mkutano kwenye ofisi ya tawi. Wanahabari zaidi ya 40 walihudhuria na wakatembezwa betheli.

Msemaji wa Mashahidi katika kusanyiko hilo akihojiwa na wanahabari wa vituo viwili vikubwa vya habari nchini Sri Lanka.

Januari 2018, ndugu na dada zaidi ya 700 wakusanyika Colombo ili kuzoezwa kwa ajili ya kusanyiko.

Wajitoleaji walifanya kazi kurekebisha viti vingi vilivyovunjika katika eneo la kusanyiko.

Kulikuwa na programu za “Njooni Mtufahamu” kwa ajili ya wajumbe katika majumba kadhaa ya Ufalme karibu na jiji la Colombo, programu hizo ziliwasaidia kuwafahamu ndugu na dada wenyeji.

Wachezaji walionyesha unamna-namna wa utamaduni wa Sri Lanka, kama katika dansi hii ya Kitamil.

Kikundi cha vijana Mashahidi waliimba wimbo “Mwaliko Wenye Upendo wa Yehova: ‘Uwe na Hekima, Mwanangu’”.

DWajumbe walifurahia kujifunza jinsi ya kutayarisha chai.

Mwishoni mwa kusanyiko wajumbe waliinua mabango yaliyoonyesha jinsi wanavyowapenda ndugu na dada wenyeji.