Hamia kwenye habari

Dada Danusha Santhakumar (kushoto), painia wa pekee akitumia picha wakati wa funzo la Biblia. Ndugu na Dada Modaragamage (kulia), wenzi wa ndoa wanaotumikia katika Betheli ya Sri Lanka, wakiongoza funzo la Biblia na kiziwi kupitia video iliyounganishwa kwenye mtandao

MEI 6, 2020
SRI LANKA

Wahubiri wa Lugha ya Ishara Wafanikiwa Licha ya Kutoweza Kuchangamana na Watu

Wahubiri wa Lugha ya Ishara Wafanikiwa Licha ya Kutoweza Kuchangamana na Watu

Kama ilivyo katika nchi nyingi, wenye mamlaka nchini Sri Lanka wameweka vizuizi ili kukabiliana na kuenea kwa ugonjwa wa virusi vya corona (COVID-19). Ili kutii vizuizi hivyo, ndugu na dada zetu katika vikundi vya lugha ya ishara (alama) wanatumia teknolojia kuwahubiria viziwi na watu wenye matatizo ya kusikia.

Dada painia anayeitwa Vihanga Fernando, anahubiri kwa kuandika barua. Kwa kuwa ni vigumu kwa viziwi kusoma maandishi, anatumia picha katika barua zake kufundisha kweli za Biblia.

Dada Fernando akitumia picha na lugha ya Kisinhala kueleza katika barua yake kwamba jina la Mungu ni Yehova

Mwanzoni, Dada Rosie Chithravelautham alikuwa na mashaka kuhusu kutumia video iliyounganishwa kwenye mtandao ili kuongoza mafunzo ya Biblia. Anaeleza hivi: “Awali nilipowapigia viziwi, mtandao haukuwa mzuri sana kwa hiyo ilikuwa vigumu kwao kuelewa ishara zangu.” Lakini Rosie aliazimia kuendelea kuongoza mafunzo wakati wa kipindi hiki cha ugonjwa wa corona. Aliamua kujaribu tena. Amefaulu kuongoza mafunzo matatu ya Biblia, na sasa wanafunzi wake wanahudhuria mikutano kupitia video iliyounganishwa kwenye mtandao.

Nirosha Shiranthi, dada kiziwi aliyebatizwa mnamo Machi 2020, alilazimika kushinda woga wake wa kuhubiri kupitia video iliyounganishwa kwenye mtandao. Alisali kwa Yehova na kumweleza hofu yake. Baadaye, alitoa ombi la kuwa painia msaidizi wakati wa majira ya Ukumbusho. Viziwi wengi walikubali mwaliko wa Nirosha, na baadhi yao walitaka kujifunza mengi zaidi kuhusu ishara ya siku za mwisho. Nirosha alifaulu kuanzisha mafunzo saba mapya ya Biblia. Anasema hivi: “Ninaposhiriki katika kazi ya kuhubiri, ninafurahi. Ingawa hatuwezi kutoka nyumbani bado tunaweza kuhubiri. Sikuzote Yehova hutimiza kusudi lake.” Nirosha ameamua kufanya upainia msaidizi kwa kuendelea.

Tunafurahi kusikia mambo hayo yaliyoonwa yenye kupendeza kutoka Sri Lanka. Ni matokeo ya jitihada zinazofanywa na ndugu na dada zetu viziwi na walio na matatizo ya kusikia ya kulisifu jina la Yehova.—Zaburi 113:1.