Hamia kwenye habari

NOVEMBA 18, 2019
MAKEDONIA KASKAZINI

‘Kuvuka na Kuingia Makedonia’ kwa Ajili ya Kampeni ya Pekee ya Kuhubiri

Ofisi ya tawi ya Makedonia Kaskazini ilianzisha kampeni ya pekee ya kuhubiri kuanzia Agosti 1 mpaka Oktoba 31, 2019, ili kushiriki ujumbe wa Biblia na watu wanaozungumza Kimakedonia na Kialbania katika eneo lao la ofisi ya tawi.

Makedonia Kaskazini ina watu zaidi ya milioni 1.3 wanaozungumza Kimakedonia na zaidi ya 500,000 wanaozungumza Kialbania. Hata hivyo, kati ya wahubiri 1,300 nchini humo, karibu wahubiri 1,000 wanatumikia katika eneo la lugha ya Makedonia na wahubiri 20 tu husaidia katika eneo la lugha ya Albania. Ili kuwaunga mkono wahubiri wa eneo hilo, wajitoleaji 476 kutoka nchi saba—Albania, Austria, Italia, Sweden, Ubelgiji, Ujerumani, na Uswisi—walishiriki katika kampeni hiyo ya kuhubiri nchini Makedonia Kaskazini.

Kitabu Biblia Inafundisha katika lugha ya Makedonia ambacho mwanamume aliyekuwa akichunga mbuzi alipewa miaka kumi iliyopita

Wakati wa kampeni hiyo, ndugu mmoja alikutana na mwanamume fulani aliyekuwa akichunga mbuzi barabarani. Mwanamume huyo alipojua kwamba anazungumza na mmoja wa Mashahidi wa Yehova, alitoa kitabu Biblia Inafundisha kutoka kwenye mkoba wake. Akasema kwamba alipewa kitabu hicho na Mashahidi fulani kutoka Italia waliomtembelea wakati wa kampeni ya pekee ya kuhubiri miaka kumi iliyopita. Alisema kwamba anasoma kitabu hicho kila siku, na hata amekariri sura kadhaa za kitabu hicho. Ndugu walifanya mipango ili afanyiwe ziara ya kurudia.

Msaada mkubwa uliotolewa na ndugu na dada wanaozungumza Kimakedonia na Kialbania unatukumbusha utayari wa Paulo wa kukubali mgawo wake alipoambiwa, “vuka uingie Makedonia.”—Matendo 16:9.