Hamia kwenye habari

SEPTEMBA 11, 2019
JAMHURI YA CHEKI

Mashahidi wa Yehova Watoa Tafsiri ya Ulimwengu Mpya Iliyorekebishwa Katika Kicheki na Kislovakia

Septemba 7, 2019, Biblia Takatifu—Tafsiri ya Ulimwengu Mpya iliyorekebishwa ilitolewa katika Kicheki na Kislovakia. Biblia hizo zilitolewa na Ndugu Stephen Lett, mshiriki wa Baraza Linaloongoza, katika mkutano wa pekee uliofanyiwa Ostrava, Jamhuri ya Cheki. Mkutano huo wa pekee uliunganishwa katika maeneo zaidi ya 200 katika Jamhuri ya Cheki na Slovakia, kukiwa na jumla ya wahudhuriaji 25,284.

Biblia hizo mpya zimetolewa baada ya kazi ya miaka minne ya vikundi vya watafsiri. Jambo muhimu kuhusu tafsiri hizo zilizorekebishwa ni kwamba ni rahisi kusoma. Mshiriki mmoja wa kikundi cha tafsiri cha Kislovakia alisema hivi: “Wengi watajikuta wakinaswa na usomaji wa masimulizi ya Biblia. Maandishi yake yanatiririka zaidi na ni ya kawaida zaidi, kwa hiyo msomaji atatamani kujua hadithi anayosoma inaendeleaje na atajikuta ikiwa vigumu kuacha kusoma.”

Kuna zaidi ya Mashahidi 15,000 wa Yehova katika Jamhuri ya Cheki na zaidi ya 11,000 nchini Slovakia watakaofaidika kutokana na Biblia hizo zilizotolewa. Mshiriki wa kikundi cha kutafsiri cha Kicheki anaeleza hivi: “Tafsiri ya Ulimwengu Mpya iliyorekebishwa inakazia kuwasilisha mawazo ya lugha ya awali kwa kutumia sentensi fupi zaidi na lugha ya kisasa. Itaeleweka zaidi si kwa Mashahidi wa muda mrefu tu, bali pia kwa vijana na wale ambao ni wapya katika kweli.”

Biblia Takatifu—Tafsiri ya Ulimwengu Mpya imetafsiriwa ikiwa nzima au kwa sehemu katika lugha 184 kutia ndani tafsiri 29 zilizorekebishwa zinazotegemea tafsiri ya 2013. Tunasali kwamba matoleo hayo mapya yatawasaidia wasomaji kuguswa na kweli za Biblia kwa njia kubwa zaidi.—Luka 24:32.