Hamia kwenye habari

MEI 31, 2019
ISRAEL

Mashahidi Nchini Israel Wafanya Jitihada za Pekee Kushiriki Mahubiri ya Hadharani

Kuanzia Mei 10 hadi 19, Mashahidi wa Yehova nchini Israel wamefanya jitihada za pekee kushiriki katika mahubiri ya hadharani jijini Tel Aviv. Kazi hiyo ilifanywa kwa sababu ya ongezeko la watalii waliokuja kuhudhuria matukio kadhaa ya kitamaduni jijini humo. Kwa mfano, kuanzia Mei 14 hadi 18, kulikuwa na mashindano ya muziki yanayoitwa Eurovision Song Contest jijini Tel Aviv, ambayo yaliwavutia watalii elfu kumi hivi.

Ndugu Gennadi Korobov, aliyesaidia katika kuratibu mahubiri hayo, anaeleza hivi: “Tulipogundua kwamba kutakuwa na maelfu ya wageni wanaokuja Tel Aviv kwa ajili ya mashindano hayo ya muziki, tuliona kwamba ni fursa nzuri ya kuongeza utendaji wetu wa kuhubiri hadharani. Tulifurahi sana kwamba jumla ya wahubiri 168 kutoka makutaniko 22 nchini Israel walijitolea.”

Kila siku akina ndugu walisimamisha vigari katika maeneo nane kuanzia saa 3:00 asubuhi hadi saa 3:00 usiku. Ili kushughulikia mahitaji ya watalii kutoka nchi mbalimbali, vigari vilikuwa na machapisho ya lugha kumi: Kiarabu, Kichina, Kiebrania, Kifaransa, Kihispania, Kiingereza, Kiitaliano, Kijapani, Kijerumani, na Kirusi.

Tuna uhakika kwamba kutakuwa na matokeo mazuri kutokana na utendaji huo ulioongezeka nchini Israel. Jitihada hizo ni uthibitisho mwingine kwamba watu wa Yehova humsifu “nyakati zote.”—Zaburi 34:1, 2.