Hamia kwenye habari

Daphane Jane akishiriki katika huduma

APRILI 14, 2020
FILIPINO

Mwadhimisho wa Ukumbusho wa 2020

Makumi ya Maelfu ya Watu Nchini Filipino Watazama Ukumbusho Baada ya Kualikwa na Kijana Painia

Mwadhimisho wa Ukumbusho wa 2020

Katika Jiji la Davao, Filipino, zaidi ya watu 31,000 ambao si Mashahidi waliunganishwa pamoja na kutaniko moja ili kuadhimisha Ukumbusho. Kwa sababu ya kutii vizuizi vya serikali, kutaniko hilo halikuweza kukutana pamoja, kwa hiyo waliadhimisha Ukumbusho kupitia video mtandaoni. Watu hao wengi walihudhuria kwa sababu ya jitihada za painia mmoja kijana.

Daphane Jane mwenye umri wa miaka 17 ni painia wa kawaida katika Jiji la Davao. Kwa miaka kadhaa ambayo imepita amekuwa akikabiliana na ugonjwa wa glakoma, ambao umedhoofisha uwezo wake wa kuona. Daphane aliazimia kumwandikia daktari ambaye amekuwa akimtibu glakoma ili atazame hotuba ya pekee na Ukumbusho kupitia video iliyounganishwa kwenye mtandao.

Daktari huyo alivutiwa sana jinsi ambavyo Daphane alifaulu kujibu maswali yake ya Biblia na kumwelekeza kwenye makala zilizo kwenye jw.org, kwa hiyo alikubali mwaliko wake. Jumapili Aprili 5, mbali tu na kujiunga mwenyewe, daktari huyo aliwaalika madaktari na wauguzi wengine 12 kutazama hotuba hiyo.

Baada ya programu hiyo, daktari mmoja alisema wazi kwamba hapo awali “aliwachukia Mashahidi wa Yehova” na alipinga huduma yetu. Lakini baada ya kusikiliza hotuba hiyo ya pekee, alisema hivi: “Ningependa kuomba msamaha kwa sababu nilimfokea dada yenu mmoja na kumwaibisha. Asanteni sana kwa kunipa nafasi ya kusikiliza hotuba hiyo. Tafadhali endeleeni na kazi yenu ya kuhubiri.”

Daktari wa Daphane aliamua pia kutazama programu ya Ukumbusho na akawaalika madaktari na wauguzi wengi zaidi. Kwa kuwa mfumo wa kuunganisha wa kutaniko usingeweza kuhudumia watu hao wote waliojiunga, daktari huyo alisaidia kuwaunganisha kupitia akaunti yake. Siku ya Ukumbusho, wataalamu wa afya, polisi, na maofisa wakuu wa serikali walijiunga katika mkutano huo. Kufikia mwisho wa Ukumbusho, zaidi ya watu 31,000 walikuwa wamejiunga kwenye programu hiyo ama kupitia video au sauti.

Mtaalamu mmoja wa tiba alimshukuru Daphane na akina ndugu kwa kumwalika na akasema: “Hatukujua kwamba Mashahidi wa Yehova huhubiri kupitia mtandao. Mnatumia teknolojia kwa njia nzuri sana.”

Mwingine alisema hivi: “Wengi kati yetu madaktari na wauguzi, tulifaulu kujiunga nanyi. Muda mrefu sana umepita tangu tuliposikiliza hotuba ya Biblia, na hii ndiyo mara ya kwanza kabisa kuisikiliza kupitia video iliyounganishwa kwenye mtandao. Tulishangaa kujua kwamba Mashahidi wanamwabudu Mungu pamoja kupitia njia hii. Tunatumaini kwamba mtaendelea kuwaruhusu watu watazame hotuba za Biblia kupitia video zilizounganishwa kupitia Intaneti. Umekuwa msaada mkubwa hasa wakati huu ambapo mambo yanazidi kuharibika.”

Watu fulani waliguswa moyo sana na hotuba ya pekee na Ukumbusho. Mtazamaji mmoja alisema hivi: “Ilikuwa mara yangu ya kwanza kulia nilipokuwa nikisikiliza hotuba ya Biblia. Ninakushukuru sana Daphane Jane kwamba ulimwalika daktari wako, nasi pia tukapata nafasi ya kufarijiwa. Sasa ninaamini kwamba kuna Mungu, na ninakushukuru kwa kunisaidia kuelewa jambo hilo.”

Baada ya kuona jinsi ambavyo Yehova amemsaidia, Daphane Jane ameazimia kuendelea kuhubiri licha ya ugonjwa wake na hali ngumu zinazosababishwa na ugonjwa wa virusi vya corona. Simulizi hili linatukumbusha kwamba hatupaswi ‘kufa moyo katika kufanya mema, kwa maana kwa wakati unaofaa tutavuna ikiwa hatutachoka kabisa.”—Wagalatia 6:9.