Hamia kwenye habari

Kushoto: Ndugu Victor White, mhitimu wa shule ya Gileadi, akitoa hotuba jijini Mindanao, nchini Filipino. Kulia: Baadhi ya wamishonari wa kwanza nchini Filipino

JUNI 14, 2022
FILIPINO

Miaka Sabini na Tano ya Utendaji wa Wamishonari Nchini Filipino

Miaka Sabini na Tano ya Utendaji wa Wamishonari Nchini Filipino

Juni 14, 1947, Ndugu Lorenzo Alpiche, Ndugu Earl Stewart, na Ndugu Victor White, walifika Manila kwa meli. Walikuwa wamishonari wa kwanza kufika nchini Filipino. Baada ya mwezi mmoja, mhitimu mwingine wa Gileadi Ndugu Nick Skelparick, alijiunga nao, wakawa wanne.

Ndugu hao walikuwa wamezoezwa vizuri na walikuwa tayari kwa ajili ya kazi. Punde si punde wakajiunga pamoja na wahubiri 2,400 waliokuwa wakihubiri nchini humo. Kufikia mwaka wa 1958, idadi ya wahubiri ilikuwa imeongezeka karibu mara kumi na kukawa na wahubiri zaidi ya 23,000. Sasa, miaka 75 imepita tangu wamishonari wa kwanza walipokuja, na leo kuna watumishi wa Yehova zaidi ya 230,000 nchini Filipino.

Ndugu Milton Henschel na Ndugu Nathan H. Knorr kwenye eneo la kusanyiko jijini Manila

Wamishonari walifika kama ilivyokuwa imepangwa hapo awali. Miezi miwili hivi kabla ya wamishonari hao kufika, Ndugu Nathan H. Knorr rais wa shirika la Watch Tower Society alitoa hotuba muhimu kwenye kusanyiko la Mashahidi wa Yehova jijini Manila lililofanyika Machi 31 hadi Aprili 2, 1947. Ndugu Knorr aliwahakikishia wale waliohudhuria kwamba wamishonari waliohitimu Gileadi wangetumwa nchini Filipino haraka iwezekanavyo ili kusaidia kupanga upya kazi ya kuhubiri baada ya uharibifu uliosababishwa na Vita vya Pili vya Ulimwengu.

Kushoto: Picha ya umati uliokusanyika kwenye siku ya kwanza ya kusanyiko lenye kichwa “Mataifa Yenye Nderemo” jijini Manila Machi 31, 1947. Kulia: Ndugu Milton Henschel akitoa hotuba

Kwenye siku ya mwisho ya kusanyiko hilo watu 151 walibatizwa katika ufuo wa Manila ambapo kulikuwa pia na meli zilizozamishwa vitani. Baadaye siku hiyo, Ndugu Knorr alitoa hotuba ya watu wote yenye kichwa “Shangwe kwa Watu Wote” mbele ya wasikilizaji 4,200. Wakati huohuo, hotuba hiyo ilipeperushwa kwenye redio kwa maelfu ya wasikilizaji nchini kote. Ndugu Knorr na Ndugu Milton Henschel, kutoka makao makuu, pia walitoa hotuba zenye kutia moyo ili kuwasaidia akina ndugu kuendelea kufanya kazi ya kuhubiri kwa utaratibu.

Baadhi ya wale ndugu na dada 151 waliobatizwa kwenye siku ya mwisho ya kusanyiko kwenye ufuo wa Manila Aprili 2, 1947

Ndugu Denton Hopkinson, mmishonari ambaye amekuwa akitumikia nchini Filipino tangu 1954, anasema hivi kuhusu utendaji uliofanywa miaka 75 iliyopita: “Wamishonari wa kwanza ambao walifika mwaka wa 1947 walifanya sehemu kubwa ya kujenga na kupanga makutaniko na kuyaandaa kwa ajili ya ongezeko kubwa ambalo lilitarajiwa.”

Tunamshukuru Baba yetu wa mbinguni, Yehova, kwa kubariki kazi ngumu na bidii ya watumishi wake nchini Filipino na ulimwenguni pote.​—Isaya 60:22.