Hamia kwenye habari

APRILI 3, 2019
FILIPINO

Mashahidi wa Yehova Watoa Tafsiri ya Ulimwengu Mpya Katika Lugha Tatu Nchini Filipino

Katika tukio la pekee lililofanywa Januari 2019, Ndugu Mark Sanderson, mshiriki wa Baraza Linaloongoza alitoa Biblia katika Kisebuano, Kitagalog, na Waray-Waray. Toleo la Kisebuano lilitolewa Januari 12 huko Hoops Dome iliyoko Lapu-Lapu City. Siku iliyofuata, toleo la Waray-Waray lilitolewa Kituo cha Masomo cha Leyte katika eneo la Palo, Leyte. Januari 20, toleo la Kitagalog lilitolewa katika Jumba la Kusanyiko la Metro Manila lililoko Quezon City.

Familia ikifurahia nakala mpya ya toleo lililorekebishwa la Tafsiri ya Ulimwengu Mpya katika Kisebuano.

Mamia ya Majumba ya Ufalme yaliunganishwa katika programu hizo, na nakala zaidi ya 163,000 za Tafsiri ya Ulimwengu Mpya zilisambazwa.

Ndugu Dean Jacek, kutoka ofisi ya tawi ya Filipino, anaeleza hivi: “Matoleo ya Kisebuano na Kitagalog yalirekebishwa kulingana na toleo la 2013 la Tafsiri ya Ulimwengu Mpya. Kila toleo lilichukua miaka mitatu kukamilisha. Lugha ya Waray-Waray ilikuwa na Maandiko ya Kigiriki ya Kikristo tu, hivyo hii ni mara ya kwanza kwa wasomaji kufurahia toleo zima la Tafsiri ya Ulimwengu Mpya. Mradi huo umechukua miaka mitano kukamilisha.”

Nchini Filipino, asilimia zaidi ya 60 ya watu wanazungumza Kisebuano, Kitagalog, au Waray-Waray. Idadi hiyo inatia ndani ndugu na dada zetu karibu 160,000 na vilevile wanafunzi wa Biblia zaidi ya 197,000. Pia, kuna makumi ya maelfu ya Wafilipino wanaoishi nje ya Filipino ambao sasa wataweza kufurahia mambo yote mapya katika Tafsiri ya Ulimwengu Mpya katika lugha hizo.

Dada Donica Jansuy, ambaye anahudhuria kutaniko la Kitagalog nchini Marekani, alisema hivi baada ya kupakua toleo jipya la Biblia: “Maneno yaliyo katika toleo lililorekebishwa la Kitagalog ni rahisi na yako wazi, na hivyo kufanya iwe rahisi kuelewa. Kutumia maneno rahisi kunatusaidia kuhisi kwamba Yehova anazungumza nasi kibinafsi, na kufanya iwe rahisi kwa ujumbe wa Biblia kugusa mioyo yetu.”

Kufikia sasa, Mashahidi wa Yehova wametoa Tafsiri ya Ulimwengu Mpya ikiwa nzima au sehemu katika lugha 179. Tunamshukuru Yehova kwa kutokeza tafsiri rahisi za Neno lake kwa ajili ya ndugu na dada zetu na wale wanaosikiliza ujumbe wa Biblia.—Matendo 13:48.