Irénise Moulonguet, aliyefikisha umri wa miaka 112 katika mwezi wa Novemba 2012, anadhaniwa kuwa ndiye raia wa Ufaransa mwenye umri mkubwa zaidi. Anajulikana kuwa mmoja wa Mashahidi wa Yehova.

Hivi karibuni, Maria Richard—mwanamke mwingine mwenye umri wa zaidi ya miaka mia moja aliyeishi Ufaransa—alidhaniwa kuwa ndiye raia wa Ufaransa mwenye umri mkubwa zaidi. Lakini kwa kweli, Irénise alimzidi umri kwa siku 22. Maria Richard, aliyekufa mwaka jana mwezi wa Oktoba akiwa na umri unaokaribia miaka 112, alikuwa pia mmoja wa Mashahidi wa Yehova.

Maisha ya Irénise hayakuwa rahisi sikuzote. Alipokuwa na umri wa miaka miwili tu, aliokoka mlipuko wa volkano wa Mlima Pelée, ulio karibu na kijiji cha kwako huko Martinique. Akiwa na miaka 15, Irénise alihamia Guiana ya Ufaransa naye akapata kazi iliyomwezesha kuitegemeza kifedha familia yao huko nyumbani. Miaka kadhaa baadaye aliporudi Martinique, aliolewa na akapata watoto. Kwa kusikitisha, mume wake, André, alikufa akiwa kijana, na kumwacha na mabinti watatu aliowalea peke yake.

Irénise alifanya kazi kwenye mashamba ya ndizi ili ajitegemeze kifedha yeye na familia yake. Mmoja wa watu waliofanya kazi naye, ambaye sasa ana umri wa miaka 80 hivi, bado anakumbuka bidii yake. Anasema hivi: “Alikuwa na uwezo wa kutayarisha kwa siku moja tu zaidi ya mikungu mikubwa 175 ya ndizi kwa ajili ya kusafirishwa!”

Ijapokuwa nyakati nyingine maisha yake yalikuwa magumu, sikuzote Irénise amekuwa na mtazamo mzuri. Mmoja wa wazao wake mwenye umri wa miaka 75 alisema kuwa Irénise ni “mcheshi sana na sikuzote anapenda kusimulia mambo mazuri anayokumbuka.” Wazee wengi huwa hivyo.

Ingawa sababu za kimaumbile huchangia kumfanya mtu aishi muda mrefu, mtindo wa maisha na mtazamo mzuri ni muhimu pia. Walipoulizwa ni nini kilichowafanya waishi muda mrefu, wazee wengi wenye umri wa zaidi ya miaka mia moja walisema kwamba wao hufuata ratiba isiyobadilika badilika, wanakula kwa kiasi, na wanajitahidi kufurahia maisha wakati wote. Utafiti mmoja ulisema hivi: “Wanaonekana kuwa watu wenye bidii na shauku.”

Kinyume na jinsi watu wengi wanavyoamini, watu wengi walioishi muda mrefu hawakuwa na maisha ya starehe sikuzote. Uchunguzi mmoja wa kina huko Ufaransa ulionyesha kwamba watu wengi wenye umri wa zaidi ya miaka mia moja walipitia hali ngumu na “ni watu wenye nguvu ambao wameshinda matatizo mengi yaliyowapata.”

Jambo hilo ni kweli kuhusu Irénise, ambaye amevumilia taabu nyingi. Mmoja wa wajukuu wake huzungumzia kwa uchangamfu kuhusu mtazamo wake mzuri. Anasema hivi: “Ingawa kwa sasa hawezi kujisogeza mwenyewe, halalamiki kamwe.”

Irénise aliyezaliwa katika familia ya Kikatoliki, alikuwa na maswali mengi kuhusu Mungu na jinsi maisha yalivyo mafupi. Alipata majibu yenye kuridhisha alipojifunza Biblia na Mashahidi wa Yehova. Akiwa na umri wa miaka 74, alijiweka wakfu kwa Yehova Mungu. Alipoulizwa ni nini ambacho humsaidia kukabiliana na matatizo ya uzee na afya, yeye husema hivi: “Yehova ni nguvu yangu. Yeye ni ‘mkono wangu wenye nguvu.’ Ndio maana najihisi ‘nimefanywa upya siku baada ya siku’!”—Kumbukumbu la Torati 3:24; 2 Wakorintho 4:​16.