Hamia kwenye habari

Hamia kwenye menyu ya pili

Mashahidi wa Yehova

Kiswahili

JANUARI 31, 2017
THAILAND

Maofisa Nchini Thailand Watumia Machapisho ya Mashahidi wa Yehova Kuisaidia Jamii

Maofisa Nchini Thailand Watumia Machapisho ya Mashahidi wa Yehova Kuisaidia Jamii

BANGKOK—Maofisa wa serikali nchini Thailand wanatumia machapisho yaliyotolewa na Mashahidi wa Yehova katika mradi wa kitaifa wa kuwaelimisha maofisa wa umma kuhusu mambo kama vile kuwalea watoto kwa njia inayofaa, kuzuia jeuri nyumbani, na kuboresha afya ya akili na ya kimwili. Mwezi huu ndipo miaka mitatu kamili inatimia tangu maofisa nchini Thailand walipoanza kutumia machapisho ya Mashahidi kushughulikia masuala ya kijamii.

Miradi ya elimu ya kitaifa ya serikali ya Thailand inapangwa na kuendeshwa katika Vituo vya Kujifunzia vya Kijamii. Kuna vituo 8,700 kama hivyo nchini kote. Isitoshe, serikali imeanzisha vituo 11 vya kuwazoeza viongozi wa jamii vinavyoitwa Vituo vya Kujifunzia vya Maendeleo ya Kijamii (CDLC). Chaiwat Saengsri, aliyesimama katikati katika picha iliyoonyeshwa, ambaye ni msimamizi wa CDLC katika mkoa wa Nakhon Nayok ulioko kaskazini mashariki ya Bangkok, anaeleza hivi: “Ninapendezwa na Mashahidi kwa sababu kusudi la kazi yao liko wazi kabisa. Lengo lao ni kusaidia jamii na watu kwa ujumla wafanye maendeleo ya kumfahamu Muumba. Sisi pia tuna lengo kama lao la kusaidia jamii yetu iinue viwango vyake ili iwe na amani na maisha mazuri.” Anaongeza hivi: “Kwa mfano, makala moja ya gazeti la Amkeni! ‘Jinsi ya Kuepuka Maneno Yenye Kuumiza’ lina habari ambayo Wizara ya Maendeleo ya Kijamii na Usalama wa Binadamu inajaribu kuwafundisha viongozi katika jamii yetu. Tuliona kwamba makala hiyo inafaa sana kwa ajili ya kuwazoeza.” Baada ya hapo, Bw. Chaiwat aliwakaribisha Mashahidi kuleta machapisho yao kwenye kongamano la SMART Leader (Kiongozi MWEREVU), lililohudhuriwa na viongozi 100 na walimu 20 kutoka mikoa 28 ili kuzoezwa jinsi ya kuongoza na kuimarisha jamii. Mashahidi wamesimama kando ya Bw. Chaiwat katika picha iliyo juu.

Anthony Petratyotin, msemaji wa Mashahidi wa Yehova nchini Thailand, anasema hivi: “Tunafurahi kujua kwamba viongozi katika jamii wanatumia vizuri mashauri yanayotegemea Biblia yanayopatikana katika machapisho yetu. Tutaendelea kuhakikisha kwamba maofisa wanaweza kupata machapisho yetu, na pia tutaendelea na kazi yetu kuu ya kuwahubiria watu wote.”

Wanahabari Wanaweza Kuwasiliana na:

David A. Semonian, Ofisi ya Habari za Umma, +1-845-524-3000

Thailand: Anthony Petratyotin, +66-2-375-2200