LILONGWE, Malawi—Mei 3, 2017, watoto wawili wa Mashahidi wa Yehova, Aaron Mankhamba, mwenye umri wa miaka 18, na Hastings Mtambalika, mwenye umri wa miaka 15, waliruhusiwa kurudi shuleni baada ya kufukuzwa kutoka Shule ya Msingi ya Khombe kwa kukataa kuimba wimbo wa taifa. Wanafunzi hao walikuwa wamekatazwa kuja shuleni tangu Februari 13, 2017. Waliruhusiwa kurudi baada ya wazazi wao na wawakilishi kutoka ofisi ya tawi ya Mashahidi wa Yehova kukata rufaa kwa wasimamizi wa shule.

Wakati wa mazungumzo yao, wawakilishi wa ofisi walitumia barua mbili kutoka kwa serikali ya Malawi ambazo waliwaonyesha wenye mamlaka shuleni. Barua moja iliyoandikwa mwaka wa 1997, ilielekezwa kwa Mashahidi wa Yehova nchini Malawi, na iliwapa kibali Mashahidi wa Yehova wasiimbe wimbo wa taifa. Barua nyingine iliyoandikwa mwaka wa 2017, iliwaomba walimu waheshimu uhuru wa ibada wa wanafunzi.

Hastings anaeleza kwamba waliruhusiwa kurudi shuleni wakati unaofaa kwa kuwa mitihani ya kitaifa ilikuwa karibu: “Tulikuwa tumehofia sana kwamba hatutaweza kufanya mitihani. Kuna fursa moja tu kwa mwaka ya kufanya mitihani hiyo.” Kukosa kufaulu kungemaanisha kwamba wangerudia darasa hilo.

Augustine Semo, msemaji wa Mashahidi wa Yehova nchini Malawi, anasema hivi: “Wanafunzi hao wanafurahi kwamba msimamo wao uliochochewa na dhamiri umeheshimiwa, na tunawashukuru wasimamizi wa shule kwa kuchagua kuunga mkono uhuru wa ibada na kuwachukua wanafunzi hao tena.”

Wanahabari Wanaweza Kuwasiliana na:

David A. Semonian, Ofisi ya Habari za Umma, simu, +1-845-524-3000

Malawi: Augustine Semo, +265-1-762-111