Vipimo vya ufikikaji

Chagua lugha

Hamia kwenye menyu ya pili

Hamia kwenye habari

Mashahidi wa Yehova

Kiswahili

OKTOBA 7, 2015
AUSTRIA

Meya Aweka Jiwe la Msingi kwa Ajili ya Kijana Mwaustria Aliyeuawa na Wanazi

Meya Aweka Jiwe la Msingi kwa Ajili ya Kijana Mwaustria Aliyeuawa na Wanazi

Gabriele Votava, meya wa jimbo la Meidling, Vienna akitoa hotuba.

VIENNA—Mei 13, 2015, watu 400 walihudhuria sherehe ya kuwekwa kwa jiwe la msingi kwa ajili ya Shahidi wa Yehova aitwaye Gerhard Steinacher, aliyeuawa na wanajeshi wa Nazi miaka 75 iliyopita kwa sababu ya kukataa kujiunga na jeshi la Ujerumani. Mgeni rasmi wa sherehe hiyo alikuwa Gabriele Votava, Meya wa jimbo la Meidling. Jiwe hilo la msingi liliwekwa nje ya nyumba ambayo familia ya Steinacher iliishi huko Lägenfeldgasse 68, Meidling, Vienna.

Programu hiyo ilikuwa na kichwa hiki: “Siwezi kumfyatulia mtu risasi,” ambayo ni maneno ya Bw. Steinacher alipokuwa akijitetea. Maneno hayo machache yanaonyesha thamani ya kanuni za Kikristo ambazo Bw. Steinacher alifuata, kama vile maneno ya Yesu katika andiko la Mathayo 19:19: “Mpende jirani yako kama wewe mwenyewe.”

Kijana Gerhard alikuwa mwanafunzi wa Biblia. Alipokuwa na umri wa miaka 17, aliamua kuwa Shahidi wa Yehova. Septemba 15, 1939, Bw. Steinacher alikamatwa alipokataa kujiunga na jeshi kwa sababu ya dhamiri na pia kuapa kuwa mshikamanifu kwa Hitler. Baada ya kufungwa kwa majuma sita huko Vienna, Bw. Steinacher aliyekuwa mahabusu, alihamishwa na kupelekwa kwenye gereza la Moabit huko Berlin, Ujerumani.

Siku ya kwanza kesi yake iliposikilizwa, Novemba 11, 1939, Bw. Steinacher alishtakiwa kwa kuwavunja nguvu wapiganaji vitani na akahukumiwa kifo. Alijitetea kulingana na imani ya dini yake. Hata hivyo, ilipofika Machi 2, 1940, Reichskriegsgericht (Mahakama ya Kijeshi ya Reich) iliunga mkono hukumu hiyo ya kifo. Majuma manne baadaye, mnamo Machi 30, Bw. Steinacher aliuawa kwa kukatwa kichwa katika gereza lililokuwa na sifa mbaya la Plötzensee, Berlin. Wakati huo alikuwa na umri wa miaka 19.

Baada ya kuweka jiwe la msingi, sherehe ziliendelea katika jumba la maonyesho la Volkshochschule lililo karibu. Mojawapo ya mambo yaliyokuwa kwenye ratiba ni maonyesho ya rekodi ya historia ya familia ya Steinacher. Mojawapo ya vitu vilivyoonyeshwa ni sanduku dogo lililopatikana mwaka 1976 ambalo lilikuwa na barua 28 kutoka kwa Ignatz na Luise Steinacher walizomwandikia mtoto wao Gerhard alipokuwa gerezani, pamoja na postikadi na barua 25 alizoandika Gerhard kuwafariji wazazi wake na kuwaeleza msimamo wake katika imani ya dini yao.

Sanduku hilo lenye barua na postikadi lilipatikana mwaka 1976 nyumbani kwa Steinacher wakati Luise, mama ya Gerhard alipokufa.

Wiener Bezirkszeitung, gazeti la kila juma la Vienna lilisema kuwa tukio hilo ni “kumbukumbu ya pekee sana” iliyofanya matendo ya ujasiri ya Bw. Steinacher “yajulikane na watu wote.” Makala hiyo iliendelea kumsifu Bw. Steinacher kwa kusema hivi: “Alikuwa tayari kufa kwa ajili ya msimamo wake.”

Wanahabari Wanaweza Kuwasiliana na:

J. R. Brown, Ofisi ya Habari za Umma, simu +1 718 560 5000

Austria: Johann Zimmermann, simu +43 1 804 53 45

Ujerumani: Wolfram Slupina, simu +49 6483 41 3110