Barua kutoka maofisa wa Oryol: “Tunathamini tendo hilo jema kwa ajili ya jamii na mazingira.”

NEW YORK—Juni 2, 2017, wenye mamlaka katika jiji la Oryol nchini Urusi waliwapa Mashahidi wa Yehova tuzo ya pekee, walithamini kazi yao ya usafi wa jiji wa kila mwaka Aprili 22, 2017. Mashahidi 70 walijitolea kutumia siku hiyo kuondoa uchafu kutoka mitaa ya jiji la Oryol na kutoka Mto Orlik ambao unapita jijini humo. Waliwapa Mashahidi zawadi ndogo na barua ambayo ilisema hivi kwa sehemu: “Tunathamini tendo hilo jema kwa ajili ya jamii na mazingira.”

Dennis Christensen akisaidia usafi wa jiji mnamo Oktoba 2011.

Hata hivyo, mwezi mmoja baada ya usafi huo, na juma moja kabla ya wenye mamlaka kuwashukuru, mjitoleaji mmoja, Dennis Christensen (kwenye picha ndogo juu), alikamatwa kwa kile kilichodaiwa kuwa shughuli zinazochochea msimamo mkali alipokuwa akihudhuria mkutano wa amani wa kidini Mei 25. Wenye mamlaka nchini Urusi wamekuwa wakitumia dai la kwamba Mashahidi wa Yehova wana msimamo mkali kuwashambulia kotekote nchini.

“Wale wanaowafahamu Mashahidi wa Yehova hawashangai kwamba Dennis, na washiriki wengine kutanikoni, walijitolea kwa hiari kufanya usafi wa jiji. Wamekuwa wakifanya hivyo kwa miaka mingi, hata wameendelea baada ya shirika lao la kisheria kuvunjwa katika mwaka wa 2016,” anasema David A. Semonian, msemaji wa Mashahidi wa Yehova katika makao yao makuu. “Mashahidi wa Yehova jijini Oryol na katika majiji mengine ulimwenguni wanajulikana kuwa raia wazuri. Hiyo ndiyo sababu inashangaza kwamba Dennis, Mkristo mwenye bidii na anayefuata sheria, angetendewa kama mhalifu baada ya kutoa mchango mzuri kwa jamii ambao ulitambuliwa na wenye mamlaka jijini Oryol. Tunaamini kwamba Dennis anapaswa kuachiliwa mara moja na kuruhusiwa kuendelea kuabudu kwa amani na kutoa huduma nzuri kwa jamii pamoja na waabudu wenzake.”

Bw. Christensen amekamatwa mwaka mmoja hivi baada ya shirika la kisheria linalotumiwa na Mashahidi katika eneo hilo kuvunjwa Juni 14, 2016. Bw. Christensen alishtakiwa baada ya uamuzi wa Aprili 20, 2017 wa Mahakama Kuu ya Urusi wa kufunga Kituo cha Usimamizi cha Mashahidi wa Yehova nchini Urusi, karibu na St. Petersburg. Bw. Christensen bado amefungwa na wenye mamlaka jijini Oryol kabla ya kusikilizwa kwa kesi yake.

Wanahabari Wanaweza Kuwasiliana na:

David A. Semonian, Ofisi ya Habari za Umma, simu +1-845-524-3000