OKTOBA 13, 2025
URUSI

Kuanzia kushoto hadi kulia, safu ya kwanza: Vasiliy Bondarev, Ivan Nikitin, Nikolay Kovadnev, na Radion Shitov. Safu ya katikati: Sergey Sachnev, Svetlana Zharkova, Marina Voytko, na Mikhail Dorofeyev. Safu ya mwisho: Ulita Sachneva na Irina Bondareva

Kuendelea Kuwa Washikamanifu na Wenye Shangwe kwa Msaada wa Yehova

CHEZA

Oktoba 1, 2025, Mahakama ya Wilaya ya Komsomolskiy iliyo katika Eneo la Khabarovsk iliwahukumu Vasiliy Bondarev, Irina Bondareva, Mikhail Dorofeyev, Nikolay Kovadnev, Ivan Nikitin, Sergey Sachnev, Ulita Sachneva, Radion Shitov, Marina Voytko, na Svetlana Zharkova. Mikhail, Nikolay, na Radion walihukumiwa kifungo cha nje cha miaka sita kila mmoja. Vasiliy, Irina, Ivan, Sergey, Ulita, Marina, na Svetlana walihukumiwa kifungo cha nje cha miaka miwili kila mmoja. Hawahitaji kwenda gerezani wakati huu.

Maelezo Mafupi Kuwahusu

Vasiliy Bondarev

Alizaliwa: 1996 (Komsomolsk-on-Amur)

Alibatizwa: 2014

Maisha yake: Anafanya kazi katika sekta ya afya. Irina, mama yake, alihukumiwa katika kesi hii

Mashtaka: Kushiriki katika mikutano ya kidini ya Mashahidi wa Yehova

Hukumu: Kifungo cha nje cha miaka miwili

Maelezo ya Kibinafsi

Umeimarishwaje na mifano ya wengine?

Kiasili, mimi ni mtu mwenye haya. Jambo hilo linafanya iwe vigumu kwangu kuzungumza mahakamani. Hata hivyo, nimeimarishwa sana na mifano ya ndugu na dada wenye umri mkubwa. Licha ya matatizo ya afya na matatizo mengine waliyo nayo, wametetea imani yao kwa ujasiri mahakamani. Ni wazi kwamba Yehova anawasaidia kukabiliana na changamoto mbalimbali walizo nazo. Mfano wao mzuri unanichochea kumtumaini Yehova hata zaidi na kukazia fikira pendeleo nililo nalo la kulitetea jina lake.

Irina Bondareva

Alizaliwa: 1961 (Komsomolsk-on-Amur)

Alibatizwa: 1993

Maisha yake: Mume wake alikufa mwaka wa 2020. Ana mwana mmoja na binti mmoja. Vasiliy, mwana wake, alihukumiwa katika kesi hii

Mashtaka: Kushiriki katika mikutano ya kidini ya Mashahidi wa Yehova

Hukumu: Kifungo cha nje cha miaka miwili

Maelezo ya Kibinafsi

Ni nini kinachokusaidia unapovunjika moyo?

Zaidi ya kuwa na mkazo unaosababishwa na mateso, ninakabaliana pia na matatizo kadhaa ya afya yanayofanya maisha yawe magumu. Vilevile, ninakabiliana na huzuni ya kumpoteza mume wangu na changamoto nyingine pia. Ninapovunjika moyo, ninajikumbusha kwamba changamoto ninazopitia ni za muda mfupi. Kwa mfano, nina kitabu changu, na humo nimeandika orodha ya mambo ambayo ningependa kufanya katika ulimwengu mpya. Huku nikisubiri ulimwengu mpya, ninajitahidi kuridhika na kufurahia uhusiano wangu na Yehova.

Nikolay Kovadnev

Alizaliwa: 1960 (Razdolnoye, Eneo la Primorye)

Alibatizwa: 1995

Maisha yake: Alikuwa mhasibu. Sasa amestaafu. Alifunga ndoa na Marina mwaka wa 2012. Marina alikufa mwaka wa 2023

Mashtaka: Kupanga mikutano ya kidini ya Mashahidi wa Yehova kupitia video mtandaoni

Hukumu: Kifungo cha nje cha miaka sita

Maelezo ya Kibinafsi

Je, umehisi Yehova akikutegemeza katika kipindi hiki kigumu?

Mke wangu alikufa mwaka wa 2023, miezi miwili baada ya msako kufanywa kwenye nyumba yetu. Kumpoteza mke wangu na kuwa mpweke ndilo jaribu kubwa zaidi ambalo nimekabili. Tulifanya kila kitu pamoja. Hata hivyo, nimejionea kwamba Yehova hajaniacha nikabili changamoto zangu pekee yangu. Badala yake, yeye hunisaidia kukabiliana na changamoto zangu zote na amenipa fursa ya kusitawisha sifa ambazo nitahitaji wakati ujao. Jambo la muhimu zaidi ni kwamba, nimejifunza kumtegemea kikamili. Badala ya kusali nisipatwe na majaribu, sasa ninamwomba Yehova anisaidie kuyavumilia majaribu, kuendelea kuwa mshikamanifu kwake, na kuliletea jina lake utukufu. Nina amani nyingi moyoni, na ninajua inatokana na Yehova.

Radion Shitov

Alizaliwa: 1972 (Komsomolsk-on-Amur)

Alibatizwa: 1998

Maisha yake: Alikuwa mwanasaikolojia katika shule ya chekechea na kazi yake ilikuwa kuwasaidia watoto wenye ulemavu. Alifunga ndoa na Yana mwaka wa 1998. Wana binti mmoja

Mashtaka: Kupanga mikutano ya kidini ya Mashahidi wa Yehova kupitia video mtandaoni

Hukumu: Kifungo cha nje cha miaka sita

Maelezo ya Kibinafsi

Nini ambacho kimekusaidia uwe na uhakika zaidi kwamba Yehova atakutegemeza?

Changamoto kubwa zaidi ambayo nimekabili ni kupambana na wasiwasi na pia kujitahidi kudhibiti hisia zangu. Biblia ina masimulizi yanayoonyesha jinsi ambavyo Yehova aliwasaidia watumishi wake waaminifu na hilo linanihakikishia kwamba atanisaidia pia. Ninapotafakari jinsi Yehova alivyowaonyesha upendo na subira watumishi wake kama vile Eliya,Yona, Loti, na Petro, ninaona wazi kwamba Yehova anaelewa udhaifu wangu na hatanihukumu kwa ukali. Nina uhakika kwamba Yehova ananitegemeza kwa sababu singeweza kuvumilia hali ninazokabili sasa bila msaada wake. Ninajua kwamba kwa msaada wake nitaendelea kuwa mshikamanifu na mwenye shangwe.

Tunapoendelea kuvumilia changamoto za siku hizi za mwisho, tunawakumbuka ndugu na dada zetu wanaoteswa na tunashangilia pamoja nao wanapoendelea kumpa Yehova utukufu kupitia imani yao.—1 Wakorintho 12:25, 26.

Ona Pia

HABARI ZA ULIMWENGUNI POTE

Mashahidi wa Yehova Waliofungwa Gerezani kwa Sababu ya Imani Yao—Kulingana na Eneo

Nchi na maeneo ambayo Mashahidi wa Yehova wamefungwa gerezani, nyakati nyingine chini ya hali ngumu, kwa sababu ya kutenda kupatana na imani yao na kutumia haki za msingi za kibinadamu.