NOVEMBA 28, 2022 | HABARI ZILIONGEZWA: APRILI 27, 2023
URUSI

HABARI ZA KARIBUNI—WATOZWA FAINI | Kumtegemea Yehova Kumeondoa Wasiwasi

CHEZA

Aprili 26, 2023, Mahakama ya Wilaya ya Leninskiy iliyo Nizhny Novgorod iliwahukumu Ndugu Oleg Konshin, Ndugu Sergey Malyanov, Ndugu Roman Zhivolupov a na Dada Svetlana Malyanova, ambaye ni binti ya Sergey. Mahakama iliwatoza faini ya kuanzia rubo 450,000 (dola 5,494 za Marekani) hadi rubo 700,000 (dola 8,546 za Marekani).

Maelezo Mafupi Kuwahusu

Oleg Konshin

Alizaliwa: 1971 (Luga, Eneo la Leningrad)

Maisha Yake: Ni fundi wa magari. Alifunga ndoa na Irina mwaka 1991. Wana watoto wawili wa kiume.

Aliwafahamu Mashahidi wa Yehova kupitia mama yake ambaye alikuwa ameanza kujifunza Biblia. Alivutiwa na mabadiliko ambayo mama yake alifanya na hilo lilimchochea Oleg kutamani kujifunza mengi zaidi. Alibatizwa mwaka wa 2003.

Maelezo ya Kibinafsi

Umejifunza somo gani kwa sababu ya kukabili mateso?

Nimekuja kutambua kwamba unapoona wengine wakiteseka, unaogopa sana. Hata hivyo, unapopitia hali hiyo wewe mwenyewe, mara moja Yehova anakupa utulivu, nguvu, na anakusaidia uwe na mtazamo mzuri. Kujua kwamba atanisaidia kunanifanya niwe na ujasiri kwamba nitaweza kutenda na kuzungumza kwa njia bora. Pia, kunanisaidia kutambua mambo ambayo sihitaji kuhofia.

Sergey Malyanov

Alizaliwa: 1969 (Nizhny Novgorod, Eneo la Nizhny Novgorod)

Maisha Yake: Alizoezwa kucheza sarakasi ya kuteleza kwenye barafu tangu alipokuwa mdogo. Alizunguka Urusi na nchi nyingine pia akiwa katika kikundi cha wanasarakasi cha Moscow Circus on Ice. Sergey ana binti anayeitwa Svetlana na wote wawili wameshtakiwa katika kesi hii

Sergey alianza kujifunza Biblia baada ya kutambulishwa na mchezaji wenzake kwa Mashahidi wa Yehova. Alihudhuria mikutano mingi ya Mashahidi wa Yehova katika maeneo mbalimbali alipokuwa akisafiri pamoja na wanasarakasi wenzake. Alivutiwa na upendo na umoja alioona. Alibatizwa mwaka wa 1998

Maelezo ya Kibinafsi

Wewe na binti yako mmewezaje kusaidiana katika kipindi hiki kigumu?

Nilipohojiwa kwa mara ya kwanza, wapelelezi walijaribu kunitia hofu kwa kuniambia nijaribu kuwazia ni nini kitatupata mimi na binti yangu ikiwa sitakubali kutia sahihi karatasi hiyo ili kukiri kwamba nina hatia. Kwa makusudi, walitufanya tupishane kwenye korido katika kituo hicho cha upelelezi ili kunipa mkazo kihisia. Ninadhani walifikiri kwamba nikimwona binti yangu nitalegeza msimamo wangu kwa sababu ningekuwa na hofu juu ya kile ambacho kingempata ikiwa singefanya walichotaka. Lakini badala ya kuwa na hofu, katika muda huo mfupi tuliweza kutiana moyo na kuhakikishiana kwamba Yehova atatusaidia. Kumwona binti yangu kulinipa ujasiri na kuliniimarisha hata zaidi. Niliwaambia moja kwa moja kwamba hata watufanye nini, sitatia sahihi yangu.

Svetlana Malyanova

Alizaliwa: 1996 (Nizhny Novgorod)

Maisha Yake: Anapenda kuandika mashairi, kusoma, na kuimba. Ni mwalimu wa Kiingereza na Kifaransa

Svetlana alipokuwa mdogo, baba yake, Sergey, alimfundisha kuhusu Yehova. Alibatizwa akiwa na miaka 20 mwaka wa 2016

Maelezo ya Kibinafsi

Mambo uliyopitia yamewatiaje moyo wengine?

Nina ugonjwa wa kuwa na wasiwasi mwingi, kwa hiyo, nilipoona ndugu na dada wanaanza kukamatwa, nilijiuliza ikiwa nitaweza kuvumilia chini ya hali kama hizo. Zamu yangu ilifika, maofisa wa polisi walipovamia nyumba yangu nami nikaanza kusali papo hapo. Nilijua kwamba ni Yehova tu ambaye ningeweza kumfikia wakati huo ili kupata msaada. Hata nilipokabili mkazo mwingi wa kihisia nilipokuwa nikihojiwa, kwa msaada wa Yehova niliweza kuvumilia hivi kwamba mimi mwenyewe sikuamini. Mara nyingine ndugu au dada anasema: “Ikiwa Svetlana aliweza kuvumilia, basi mimi pia ninaweza!”

Ndugu na dada zetu wanaoendelea kuwa waaminifu licha ya mateso wanayokabili ni ushahidi hakika wa kwamba wale ‘wanaomtumaini Yehova watakuwa jasiri na wenye moyo mkuu.’—Zaburi 27:14.

Mfuatano wa Matukio

Februari 7, 2019

Hakimu alimruhusu ofisa wa polisi kufuatilia simu ambazo Sergey anapiga na kupokea na hata njia nyingine za mawasiliano ya kielektroni anazotumia
Julai 16-17, 2019

Maofisa wa polisi walifanya msako katika nyumba 31 za Mashahidi wa Yehova wanaoishi katika Eneo la Nizhny Novgorod. Oleg, Sergey, na Svetlana walikamatwa na kupelekwa kizuizini. Kesi ya uhalifu ilifunguliwa dhidi yao
Julai 18, 2019

Oleg, Sergey, na Svetlana waliruhusiwa kutoka kizuizini. Mahakama iliwazuia ndugu hao wawili kuwasiliana wao kwa wao, kuondoka nyumbani muda fulani, au kutumia Intaneti
Agosti 24, 2021

Roman alishtakiwa rasmi kwa sababu ya kushiriki katika utendaji wa shirika lenye msimamo mkali na akawekewa vizuizi vya kusafiri
Machi 3, 2022

Kesi ya uhalifu ilianza

a b Picha ya Ndugu Roman Zhivolupov haikupatikana makala hii ilipokuwa ikitayarishwa.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI