MEI 23, 2024 | HABARI ZIMEONGEZWA: JANUARI 21, 2025
URUSI

HABARI ZA KARIBUNI—NDUGU AHUKUMIWA | “Yehova Atakuwa Pamoja Nami”

CHEZA

Januari 20, 2025, Mahakama ya Wilaya ya Urupskiy iliyo katika Jamhuri ya Karachayevo-Circassian ilimhukumu Ndugu Aleksey Pasynkov kifungo cha nje cha miaka sita. Hahitaji kwenda gerezani wakati huu.

Maelezo Mafupi Kumhusu

Aleksey Pasynkov

Alizaliwa: 1988 (Moscow, Mkoa wa Moscow)

Maisha Yake: Alilelewa na mama yake. Aleksey anafanya kazi akiwa fundi bomba na ni mjenzi anayeshughulikia hatua za mwisho za ujenzi wa ndani ya nyumba

Aleksey alipokuwa na umri wa miaka kumi, mama yake alianza kujifunza Biblia na Mashahidi wa Yehova. Alivutiwa sana kuona jinsi Mashahidi wanavyoiheshimu Biblia na jinsi walivyoonyesha upendo. Mama ya Aleksey alibatizwa mwaka wa 2000, na Aleksey akabatizwa mwaka wa 2002

Alifunga ndoa na Yuliya mwaka wa 2013. Wana mwana mmoja aliye na ulemavu

Maelezo ya Kibinafsi

Ni mstari gani wa Biblia ambao umekusaidia wewe na mke wako kupata nguvu za kuvumilia?

Mara nyingi huwa ninatafakari andiko la 1 Wakorintho 10:13, linalosema: “Hakuna majaribu ambayo yamewapata ninyi ila yale yaliyo ya kawaida kwa watu. Lakini Mungu ni mwaminifu, naye hatawaacha mjaribiwe kupita mnavyoweza kuhimili, bali pamoja na majaribu hayo ataifanya pia njia ya kutokea ili mweze kuyavumilia.” Miaka kadhaa iliyopita mimi na mke wangu tumekabiliana na majaribu mbalimbali magumu. Mwana wetu alizaliwa akiwa na matatizo mabaya sana ya kiakili. Kwa sasa ana umri wa miaka nane na sikuzote anahitaji uangalizi wa karibu. Mwaka wa 2021, wazazi wa mke wangu walipatwa na aksidenti ya gari. Baba yake alikufa, na mama yake alipata ulemavu. Kisha mateso haya yakaanza. Mstari huu hunikumbusha kwamba mateso haya ni sehemu mbaya zaidi ya maisha katika mfumo huu. Lakini mara nyingi tumejionea Yehova akiwa karibu, na akitupatia nguvu za kuvumilia. Bila shaka, ningependa kuona matatizo haya yote yakiondolewa haraka iwezekanavyo. Lakini nina uhakika kwamba hata ikiwa matatizo yangu yataendelea kwa muda mrefu kadiri gani, Yehova atakuwa pamoja nami.

Tunafurahi sana kujua kwamba hata ingawa tunakabili majaribu mbalimbali, sikuzote tunaweza kupata kimbilio na shangwe katika Yehova.—Zaburi 5:11.

Mfuatano wa Matukio

Novemba 23, 2021

Wenye mamlaka walimkamata Aleksey kwenye eneo lake la kazi, kisha wakafanya msako nyumbani kwake
Desemba 8, 2022

Kesi ya uhalifu ilifunguliwa
Machi 3, 2023

Nyumba ilifanyiwa msako kwa mara ya pili. Aleksey na Yuliya wakahojiwa
Machi 31, 2023

Nyumba ya mama ya Aleksey na kaka zake zilifanyiwa msako
Oktoba 4, 2023

Aliwekewa vizuizi vya kusafiri
Desemba 14, 2023

Kesi ya uhalifu ilianza

Huenda Ukapenda Pia

HABARI ZA ULIMWENGUNI POTE

Mashahidi wa Yehova Waliofungwa Gerezani kwa Sababu ya Imani Yao—Kulingana na Eneo

Nchi na maeneo ambayo Mashahidi wa Yehova wamefungwa gerezani, nyakati nyingine chini ya hali ngumu, kwa sababu ya kutenda kupatana na imani yao na kutumia haki za msingi za kibinadamu.