Kisidama

Novemba 7, 2025, Ndugu Lemma Koyra, mshiriki wa Halmashauri ya Tawi ya Ethiopia, alitangaza kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika Kisidama. Tangazo hilo lilitolewa katika siku ya kwanza ya Kusanyiko la Eneo la 2025 la “Ibada Safi” lililofanyiwa Yirgalem. Watu 751 walihudhuria kusanyiko hilo na wote walipata nakala iliyochapishwa ya Maandiko ya Kigiriki ya Kikristo. Toleo hilo pia lilipatikana kwa ajili ya kupakuliwa katika mfumo wa kielektroni kwenye jw.org na programu ya JW Library.

Kuna watu milioni tano hivi wanaozungumza Kisidama nchini Ethiopia. Kati yao, ni ndugu na dada 690 wanaotumikia katika makutaniko 17 ya Kisidama.

Kiwolaita

Novemba 7, 2025, Ndugu Surafel Ephraim na Ndugu Amanuel Abraha, washiriki wa Halmashauri ya Tawi ya Ethiopia, walitangaza kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika Kiwolaita. Matangazo hayo yalitolewa katika Makusanyiko mawili ya Eneo ya 2025 ya “Ibada Safi” yaliyofanywa wakati uleule. Kusanyiko moja lilifanyiwa katika jiji la Channo na lilikuwa na hudhurio la watu 286, na lingine lilifanyiwa katika jiji la Soddo na lilikuwa na hudhurio la watu 515. Wote waliohudhuria katika maeneo hayo mawili walipata nakala iliyochapishwa ya Maandiko ya Kigiriki ya Kikristo. Mara tu baada ya tangazo, toleo hilo pamoja na rekodi za kusikiliza vilipatikana kwa ajili ya kupakuliwa katika mfumo wa kielektroni kwenye jw.org na programu ya JW Library.

Ingawa kuna tafsiri nyingine za Biblia katika Kiwolaita, tafsiri hizo zinatumia lugha ya zamani ambayo ni ngumu kuelewa. Kwa sasa, kuna watu milioni 2.3 hivi wanaozungumza Kiwolaita nchini Ethiopia, kutia ndani ndugu na dada 430 hivi wanaotumikia katika makutaniko 11 ya Kiwolaita nchini humo.

Kimotu

Novemba 8, 2025, Ndugu Kukuna Jack, mshiriki wa Halmashauri ya Tawi ya Papua New Guinea, alitangaza kutolewa kwa Biblia—Habari Njema Kulingana na Mathayo katika Kimotu. Tangazo hilo lilitolewa katika programu ya pekee iliyofanyiwa katika Jumba la Kusanyiko huko Port Moresby. Watu 994 walihudhuria programu hiyo na wote walipata nakala iliyochapishwa ya Biblia—Habari Njema Kulingana na Mathayo. Toleo hilo pamoja na rekodi ya kusikiliza vilipatikana ajili ya kupakuliwa katika mfumo wa kielektroni kwenye jw.org na programu ya JW Library.

Kimotu ni kati ya lugha zinazozungumzwa na watu wengi zaidi nchini Papua New Guinea. Kuna watu 40,000 hivi wanaozungumza lugha hiyo nchini humo. Isitoshe, leo kuna zaidi ya ndugu na dada 240 wanaotumikia katika makutaniko sita ya Kimotu nchini Papua New Guinea. Wahubiri hao wenye bidii wanaongoza jumla ya mafunzo 354 na wanatazamia kwa hamu kutumia tafsiri hiyo ya kitabu cha Mathayo katika huduma.

Kinsenga (cha Msumbiji)

Novemba 30, 2025, Ndugu Patrick Hecker, mshiriki wa Halmashauri ya Tawi ya Msumbiji, alitangaza kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika Kinsenga (cha Msumbiji). Tangazo hilo lilitolewa katika programu ya pekee iliyofanyiwa Kawama. Ndugu na dada 767 walihudhuria programu hiyo ana kwa ana na wengine 1,998 waliunganishwa kupitia video mtandaoni. Wote waliohudhuria walipata nakala iliyochapishwa ya Maandiko ya Kigiriki ya Kikristo. Mara tu baada ya tangazo, toleo hilo lilipatikana kwa ajili ya kupakuliwa katika mfumo wa kielektroni kwenye jw.org na programu ya JW Library. Pia, rekodi za kusikiliza za baadhi ya vitabu vya Maandiko ya Kigiriki ya Kikristo zilipatikana kwa ajili ya kupakuliwa.

Inakadiriwa kwamba leo, kuna watu 217,500 hivi wanaozungumza Kinsenga (cha Msumbiji), kutia ndani ndugu na dada 2,300 hivi wanaotumikia katika makutaniko 60 ya Kinsenga (cha Msumbiji).