Kimixe (cha Eneo la Kaskazini ya Kati)

Agosti 8, 2025, Ndugu Adrian Fernandez, mshiriki wa Halmashauri ya Tawi ya Amerika ya Kati, alitangaza kutolewa kwa Biblia—Habari Njema Kulingana na Mathayo na vilevile vitabu vya Biblia vya Marko na Luka katika Kimixe (cha Eneo la Kaskazini ya Kati). Tangazo hilo lilitolewa katika siku ya kwanza ya Kusanyiko la Eneo la 2025 la “Ibada Safi” lililofanyiwa Santa Lucía del Camino, Oaxaca, Mexico, ambapo watu 448 walihudhuria. Wote waliohudhuria walipata nakala zilizochapishwa za Biblia—Habari Njema Kulingana na Mathayo. Vitabu hivyo vilikuwa tayari kwa ajili ya kupakuliwa kwenye tovuti ya jw.org na kwenye programu ya JW Library. Rekodi za kusikiliza za vitabu vya Mathayo na Marko pia zilitolewa kwenye kusanyiko hilo.

Hivi ni vitabu vya kwanza vya Biblia kuwahi kutafsiriwa katika Kimixe (cha Eneo la Kaskazini ya Kati). Kuna watu 139,000 hivi wanaozungumza lugha hiyo, kutia ndani Ndugu na dada zetu 463 wanaotumikia katika makutaniko 11 ya Kimixe (cha Eneo la Kaskazini ya Kati) nchini Mexico.

Kitiv

Agosti 8, 2025, Ndugu Christopher Slay, mshiriki wa Halmashauri ya Tawi ya Nigeria, alitangaza kutolewa kwa Biblia Takatifu—Tafsiri ya Ulimwengu Mpya ikiwa nzima katika Kitiv. Tangazo hilo lilitolewa katika Kusanyiko la Eneo la 2025 la “Ibada Safi” lililofanyiwa Makurdi, Jimbo la Benue, Nigeria. Watu 363 walihudhuria kusanyiko hilo na wengine 1,271 waliunganishwa kupitia video mtandaoni kutoka katika maeneo mawili. Wote waliohudhuria walipata nakala iliyochapishwa ya Tafsiri ya Ulimwengu Mpya. Isitoshe, Biblia hiyo ilikuwa tayari kwa ajili ya kupakuliwa kwenye tovuti ya jw.org na kwenye programu ya JW Library.

Kitiv kinazungumzwa na watu milioni 5.2 hivi na ni kati ya lugha kuu zinazozungumzwa nchini Nigeria. Kuna watu wengine 10,000 hivi wanaozungumza Kitiv katika nchi jirani ya Kamerun. Mashahidi wa Yehova walianza kuwahubiria watu wanaozungumza Kitiv mwishoni mwa miaka ya 1950. Leo, kuna Ndugu na dada 1,000 hivi nchini Nigeria wanaotumikia katika makutaniko 25 na vikundi 8 vya Kitiv.

Kiacholi

Agosti 22, 2025, Ndugu Martin Lowum, mshiriki wa Halmashauri ya Tawi ya Uganda, alitangaza kutolewa kwa Biblia—Habari Njema Kulingana na Mathayo katika Kiacholi. Tangazo hilo lilitolewa katika siku ya kwanza ya Kusanyiko la Eneo la 2025 la “Ibada Safi” lililofanyiwa Lira, Uganda, ambalo lilikuwa na hudhurio la watu 804. Wote waliohudhuria walipata nakala iliyochapishwa ya Biblia—Habari Njema Kulingana na Mathayo. Kitabu hicho cha Biblia kilikuwa tayari kwa ajili ya kupakuliwa kwenye tovuti ya jw.org na kwenye programu ya JW Library.

Kuna watu milioni mbili hivi wanaozungumza Kiacholi nchini Uganda. Ingawa kuna tafsiri ya Biblia katika Kiacholi, tafsiri hiyo haitumii jina la kibinafsi la Mungu, Yehova. Ndugu na dada zetu 214 wanaozungumza Kiacholi wamefurahi sana kupata tafsiri ya kitabu cha Biblia cha Mathayo ambayo imerudisha jina la Yehova mahali pake.

Kigarifuna

Agosti 22, 2025, Ndugu Joel Izaguirre, mshiriki wa Halmashauri ya Tawi ya Amerika ya Kati, alitangaza kutolewa kwa Biblia—Habari Njema Kulingana na Mathayo katika Kigarifuna. Tangazo hilo lilitolewa katika Kusanyiko la Eneo la 2025 la “Ibada Safi” lililofanyiwa San Pedro Sula, Honduras. Nakala zilizochapishwa za Biblia—Habari Njema Kulingana na Mathayo zilisambazwa kwa watu 281 waliokuwa wamehudhuria. Isitoshe, toleo hilo lilikuwa tayari kwa ajili ya kupakuliwa kwenye tovuti ya jw.org na kwenye programu ya JW Library.

Watu 120,000 hivi nchini Belize, Guatemala, na Honduras wanazungumza Kigarifuna. Kwa sasa, kuna ndugu na dada 201 wanaotumikia katika makutaniko 9 na kikundi kidogo kimoja nchini Honduras, na kutaniko moja nchini Guatemala.

Kijula

Agosti 22, 2025, Ndugu Souleymane Ouédraogo, mshiriki wa Halmashauri ya Tawi ya Afrika Magharibi, alitangaza kutolewa kwa Biblia—Habari Njema Kulingana na Mathayo katika Kijula. Tangazo hilo lilitolewa kwa watu 317 waliohudhuria Kusanyiko la Eneo la 2025 la “Ibada Safi” lililofanyiwa Bobo-Dioulasso, Burkina Faso. Wengine 51 waliunganishwa kupitia video mtandaoni. Wote waliohudhuria walipata nakala iliyochapishwa ya Biblia—Habari Njema Kulingana na Mathayo. Pia, toleo hilo lilikuwa tayari kwa ajili ya kupakuliwa kwenye tovuti ya jw.org na kwenye programu ya JW Library.

Kuna watu milioni kumi hivi wanaozungumza Kijula kwenye nchi za Afrika Magharibi. Nchini Burkina Faso, kuna watu milioni tatu hivi wanaozungumza Kijula na ndugu na dada 235 wanaotumikia katika makutaniko saba ya Kijula. Nchini Côte d’Ivoire, kuna zaidi ya watu milioni mbili wanaozungumza Kijula na ndugu na dada 49 wanaotumikia katika kutaniko moja na vikundi viwili.

Lahaja ya Kijerumani

Agosti 22, 2025, Ndugu Manuel Velasco, mshiriki wa Halmashauri ya Tawi ya Amerika ya Kati, alitangaza kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika Lahaja ya Kijerumani. Tangazo hilo lilitolewa katika Kusanyiko la Eneo la 2025 la “Ibada Safi” lililofanyiwa Cuauhtémoc, Chihuahua, Mexico. Nakala zilizochapishwa zilisambazwa kwa watu 312 waliokuwa wamehudhuria. Pia, toleo hilo lilikuwa tayari kwa ajili ya kupakuliwa katika mfumo wa kidijitali kwenye tovuti ya jw.org na kwenye programu ya JW Library.

Kuna watu 500,000 hivi wanaozungumza Lahaja ya Kijerumani ulimwenguni pote. Leo, kuna makutaniko matano ya Lahaja ya Kijerumani nchini Mexico, moja nchini Bolivia, kutaniko moja na kikundi kimoja nchini Kanada, kikundi kimoja nchini Paraguai, na kutaniko moja nchini Marekani. Ndugu na dada 341 wanaotumikia katika makutaniko na vikundi hivyo wanafurahia sana kuwa na Maandiko ya Kigiriki ya Kikristo ambayo wataweza kutumia katika funzo la kibinafsi na huduma.

Kiromani (cha Makedonia) na Kiromani (cha Makedonia) cha Kisirili

Agosti 22, 2025, Ndugu Mark Sanderson, mshiriki wa Baraza Linaloongoza, alitangaza kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika Kiromani (cha Makedonia) katika maandishi ya Kisirili na Kiroma. Tangazo hilo lilitolewa kwa watu 877 waliohudhuria Kusanyiko la Eneo la 2025 la “Ibada Safi” lililofanyiwa Skopje, Makedonia Kaskazini. Isitoshe, watu wengine 176 waliunganishwa kwenye programu hiyo kupitia video mtandaoni. Nakala zilizochapishwa za Maandiko ya Kigiriki ya Kikristo katika Kiromani (cha Makedonia) cha Kisirili zilisambazwa kwa wote waliohudhuria. Matoleo hayo pamoja na rekodi za kusilikiza zilikuwa tayari kwa ajili ya kupakuliwa kwenye tovuti ya jw.org na programu ya JW Library.

Kuna watu 46,000 hivi wanaozungumza Kiroma nchini Makedonia Kaskazini, kutia ndani ndugu na dada zetu 360. Kwa sasa wanatumikia katika makutaniko manne nchini humo. Pia, kuna wahubiri wengine 150 wanaotumikia katika makutaniko na vikundi vya Kiromani (cha Makedonia) katika nchi mbalimbali barani Ulaya.

Kituruki

Agosti 22, 2025, Ndugu Jacob Rumph, mshiriki wa Baraza Linaloongoza, alitangaza kutolewa kwa toleo lililorekebishwa la Biblia Takatifu—Tafsiri ya Ulimwengu Mpya katika Kituruki. Tangazo hilo lilitolewa kwa watu 2,504 waliohudhuria Kusanyiko la Eneo la 2025 la “Ibada Safi” lililofanyiwa Istanbul, Uturuki. Wengine 1,654 waliunganishwa kwenye programu hiyo kupitia video mtandaoni. Tafsiri ya Ulimwengu Mpya iliyorekebishwa ilikuwa tayari kwa ajili ya kupakuliwa kwenye jw.org na programu ya JW Library. Pia, rekodi za kusikiliza za Maandiko ya Kigiriki ya Kikristo zilikuwa tayari kwa ajili ya kupakuliwa. Nakala iliyochapishwa ya Tafsiri ya Ulimwengu Mpya pamoja na rekodi za kusikiliza za Biblia nzima zitapatikana baadaye katika mwaka wa 2026.

Kuna watu milioni 85 wanaozungumza Kituruki nchini Uturuki. Mashahidi wa Yehova walianza kuhubiri nchini Uturuki mwaka wa 1930. Leo, kuna na ndugu na dada 3,365 wanaotumikia katika makutaniko 44 nchini humo. Wengine 1,259 wanatumikia katika makutaniko na vikundi vya Kituruki katika nchi mbalimbali barani Ulaya.

Kikrioli cha Shelisheli

Agosti 29, 2025, Ndugu Kenneth Cook, Jr., mshiriki wa Baraza Linaloongoza, alitangaza kutolewa kwa Biblia Takatifu—Tafsiri ya Ulimwengu Mpya ikiwa nzima katika Kikrioli cha Shelisheli katika Kusanyiko la Eneo la 2025 la “Ibada Safi” lililofanyiwa Victoria, Shelisheli. Kulikuwa na wahudhuriaji 528. Wote waliohudhuria walipewa nakala zilizochapishwa za Biblia hiyo. Nakala za kidijitali za Biblia hiyo ya Tafsiri ya Ulimwengu Mpya pamoja na rekodi za kusikiliza zilikuwa tayari kwa ajili ya kupakuliwa kwenye jw.org na kwenye programu ya JW Library.

Kuna watu 115,000 hivi wanaozungumza Kikrioli cha Shelisheli nchini Shelisheli. Nchi hiyo ipo nje ya pwani ya Afrika Mashariki na imefanyizwa na visiwa 115. Kwa sasa, kuna ndugu na dada 330 wanaotumikia katika makutaniko manne ya Kikrioli cha Shelisheli nchini humo.

Kisepulana

Agosti 30, 2025, Ndugu Jody Jedele, mshiriki wa Baraza Linaloongoza, alitangaza kutolewa kwa Biblia Takatifu—Tafsiri ya Ulimwengu Mpya katika Kisepulana. Tangazo hilo lilitolewa kwa watu 2,227 waliohudhuria programu ya pekee iliyofanyiwa Sabie, Afrika Kusini. Wengine 1,426 kutoka maeneo mbalimbali waliunganishwa kwenye programu hiyo kupitia video mtandaoni. Wote waliohudhuria walipata nakala zilizochapishwa. Isitoshe, Biblia hiyo pamoja na rekodi za kusikiliza zilikuwa tayari kwa ajili ya kupakuliwa kwenye tovuti ya jw.org na programu ya JW Library.

Biblia Takatifu—Tafsiri ya Ulimwengu Mpya ndiyo Biblia ya kwanza kutafsiriwa ikiwa nzima katika Kisepulana. Kuna watu 800,000 hivi wanaozungumza Kisepulana nchini Afrika Kusini. Kuna ndugu na dada 400 wanaotumikia katika makutaniko kumi na kikundi kimoja cha Kisepulana.

Lugha ya Aukan, Saramaccan, na Sranantongo

Agosti 31, 2025, mkutano wa pekee ulifanywa Paramaribo, Suriname. Jumla ya watu 2,699 walihudhuria programu hiyo ana kwa ana, na wengine 9,619 waliunganishwa kupitia video mtandaoni.

Katika mkutano huo, Ndugu Geoffrey Jackson, mshiriki wa Baraza Linaloongoza, alitangaza kutolewa kwa vitabu kadhaa vya Biblia katika lugha hizo tatu zinazozungumzwa nchini Suriname. Alitangaza kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika lugha ya Aukan; Biblia—Habari Njema Kulingana na Mathayo pamoja na vitabu vya Marko, Luka, na Yohana katika lugha ya Saramaccan; na toleo lililorekebishwa la vitabu vya Maandiko ya Kigiriki ya Kikristo pamoja na Kitabu cha Biblia cha Ezekieli katika lugha ya Sranantongo.

Wale wanaozungumza lugha ya Saramaccan ambao walihudhuria programu hiyo walipata nakala iliyochapishwa ya Biblia—Habari Njema Kulingana na Mathayo. Nakala iliyochapishwa ya Maandiko ya Kigiriki ya Kikristo katika lugha ya Aukan itapatikana mwishoni mwa mwaka huu. Matoleo yote yalikuwa tayari kupakuliwa katika mfumo wa kidijitali kwenye tovuti ya jw.org na programu ya JW Library. Pia, rekodi za kusikiliza za baadhi ya vitabu vya Biblia katika lugha hizo zitakuwa tayari kwa ajili ya kupakuliwa hivi karibuni.