Novemba 8, 2025, Ndugu Jody Jedele, mshiriki wa Baraza Linaloongoza, aliweka wakfu majengo 24 ya kitheokrasi katika eneo la ofisi ya tawi ya Amerika ya Kati. a Programu hiyo ya pekee ilifanywa katika Jumba la Kusanyiko la El Tejocote huko Fraccionamiento El Tejocote, Mexico. Watu 2,629 walihudhuria programu hiyo ana kwa ana, na wengine 1,725 kutoka maeneo matatu waliunganishwa kupitia video mtandaoni. Majengo haya yaliyowekwa wakfu yatategemeza kazi ya kutoa elimu ya Biblia kwa wahubiri zaidi ya milioni moja wanaotumikia katika eneo la Amerika ya Kati.

Kwa kupendeza, ndugu na dada wengi walifanya kazi kwa bidii ili kutafsiri sehemu mbili za programu hiyo kwa lugha 50 hivi. Siku iliyofuata, programu yote nzima, kutia ndani sehemu hizo mbili za saa nzima zilizotafsiriwa, zilipeperushwa kwa makutaniko 15,000 katika eneo la ofisi hiyo ya tawi. Ndugu anayeitwa Ever alisema hivi baada ya kutazama programu hiyo katika lugha yake ya Kihuastec (cha San Luis Potosi): “Niliposikia sehemu ya programu hiyo katika lugha yangu, nilijihisi nikiwa mwenye thamani mbele za Yehova. Ananihakikishia kwamba hataki chochote kinizuie kuelewa kile anachotaka kunifundisha.”

Jumba la Kusanyiko Nchini Nikaragua. Kwa miaka mingi, ndugu na dada wengi nchini Nikaragua hawakuwa na mahali pazuri pa kufanyia makusanyiko. Mara nyingi walihitaji kufanya makusanyiko nje kwenye jua kali au kwenye viwanja ambavyo vingefurika upesi ikiwa kungenyesha. Lakini sasa, ndugu na dada zetu wamefurahia sana kupata Jumba la Kusanyiko linalopendeza na linalostarehesha jijini Chichigalpa. Jumba hilo jipya linaweza kutoshea watu 1,200.

Kituo cha Elimu ya Biblia Nchini Kosta Rika. Ili kutosheleza uhitaji unaoendelea kukua wa waeneza-injili wa Ufalme nchini Kosta Rika, ofisi ya tawi ya nchi hiyo iligeuzwa na kuwa kituo cha kisasa cha elimu ya Biblia. Mradi huo wa ukarabati ulichukua miaka mitatu kukamilika. Majengo hayo yako katika jiji la Belén, na yana vyumba 34 vya kuishi kwa ajili ya walimu na wanafunzi, madarasa mawili, ofisi, sehemu ya kulia chakula, na chumba cha kufulia nguo. Madarasa matano ya Shule ya Waeneza-Injili wa Ufalme na madarasa saba ya Shule ya Waangalizi wa Mzunguko na Wake Zao yanaweza kufanyiwa katika kituo hicho kila mwaka.

Ofisi za Utafsiri Nchini Belize, Guatemala, Honduras, Mexico, na Panama. Ofisi ya tawi ya Amerika ya Kati husimamia kazi za utafsiri wa machapisho yetu yanayotegemea Biblia katika lugha 7 za ishara na lugha 70 za asili. Ofisi 22 za utafsiri zilizowekwa wakfu zitawawezesha watafsiri kuishi na kufanya kazi katika maeneo ambayo lugha hizo zinazungumzwa. Mpango huo utawasaidia watafsiri kuelewa utamaduni wa watu wanaozungumza lugha hizo na jinsi wanavyozungumza, na hivyo kutokeza machapisho na video zenye ubora wa juu.

Tunashangilia pamoja na ndugu na dada zetu wanaoishi Amerika ya Kati na Mexico. Majengo hayo ya kitheokrasi yaliyowekwa wakfu yatawasaidia watu wengi zaidi wenye moyo mnyoofu wamjue Yehova!—Yeremia 31:34.

Picha ya majengo 24 yaliyowekwa wakfu Novemba 2025.