Katika mwezi wa Septemba 2025, Mashahidi wa Yehova walishiriki katika kampeni ya ulimwenguni pote ya kuhubiri kwa kutumia gazeti la Mnara wa Mlinzi Na. 1 la 2025 lenye kichwa, “Mwisho wa Vita—Jinsi Gani?” Mashahidi wa Yehova walishiriki ujumbe wa Biblia wa amani pamoja na wengine, na kuwaalika waliopendezwa wahudhurie hotuba ya pekee yenye kichwa hicho mwishoni mwa kampeni hiyo. Jitihada hizo za ndugu na dada zetu ulimwenguni pote zilikuwa na matokeo mazuri yenye kutia moyo. Yafuatayo ni baadhi ya mambo yaliyoonwa.

ARMENIA

Ndugu wawili waliokuwa wakihubiri nyumba kwa nyumba huko Yerevan walimwuliza mwanamke mmoja ikiwa amewahi kufikiria kuhusu wakati ambapo vita havitakuwepo tena. Mwanamke huyo alisema kwamba alitamani vita viishe na kwamba sikuzote alikuwa akisali kwa Mungu kuwe na amani. Walipokuwa wakiendelea na mazungumzo, mume wa mwanamke huyo alifika na kujiunga na mazungumzo hayo na akawaomba ndugu hao wawili waingie ndani ya nyumba yao. Wenzi hao walieleza kwamba walikuwa wamepoteza nyumba yao walipokimbia kutoka katika eneo la vita. Pia, walisema kwamba hali za ulimwengu zinawahangaisha sana. Ndugu zetu waliwatia moyo wenzi hao na kuwaonyesha video Kwa Nini Mungu Aliiumba Dunia? Baada ya kuzungumzia mambo kadhaa kutoka kwenye video hii, wenzi hao wa ndoa walikubali kujifunza Biblia.

EKUADO

Dada mmoja huko Guayaquil alianzisha mazungumzo na mwanamke mmoja kwa kumweleza mambo kadhaa kutoka kwenye makala yenye kichwa, “Kutafuta Amani Licha ya Vita na Ukatili” iliyo katika gazeti hilo. Kisha, dada yetu alimsomea mwanamke huyo Zaburi 72:7 inayoahidi kwamba “amani itakuwa nyingi” milele. Mwanamke huyo aliguswa sana na ujumbe huo. Alikubali kuonyeshwa jinsi funzo linavyofanywa, na wakajifunza pamoja somo la kwanza la broshua Furahia Maisha Milele! Katika ziara iliyofuata, dada yetu alimkuta mwanamke huyo akisubiri kwa hamu ili waendeleze mazungumzo yao. Mwanamke huyo sasa anajifunza na anapanga kuhudhuria mikutano yetu.

FINLAND

Mashahidi walimtembelea mwanamke mmoja nyumbani kwake katika mji wa Vihti na wakamwuliza ikiwa kuna siku ambayo vita vitaisha. Mwanamke huyo akasema kuwa aliona swali hilo katika kigari cha machapisho na ingawa hakusimama wakati huo ili kujifunza mengi, alitamani kupata jibu la swali hilo. Alisema kuwa anafanya kazi na wakimbizi na anajionea kihalisi madhara ya vita hasa kwa watoto. Dada zetu walimwonyesha Zaburi 46:9 inayozungumzia ahadi ya Mungu ya ‘kukomesha vita’ na mwanamke huyo akauliza ikiwa andiko hilo linarejelea maisha baada ya kifo huko mbinguni. Hata hivyo, dada zetu walimsomea mstari wa 8, wakikazia maneno “duniani.” Hilo liliongoza kwenye mazungumzo mazuri kuhusu mambo mbalimbali ambayo Biblia inafundisha. Baadaye, mwanamke huyo alisema kwamba angependa kujifunza mengi zaidi.

TANZANIA

Mwanafunzi mmoja kijana alikaribia kigari cha machapisho jijini Dar es Salaam na akachukua nakala ya gazeti la Mnara wa Mlinzi Na. 1 la 2025. Mara moja, ndugu wawili waliokuwa hapo wakamwalika ajifunze Biblia, na akakubali. Baadaye siku hiyo, walizungumza tena na mwanamume huyo kijana na wakamwonyesha video, Ni Nini Hutendeka Kwenye Funzo la Biblia? Ingawa alipenda kujifunza, alisema kwamba angepatikana tu muda wa usiku. Ndugu hao walikubali kujifunza naye saa 4 usiku. Mwanamume huyo kijana sasa anafanya maendeleo mazuri na anaendelea kujifunza kitabu Furahia Maisha Milele!

THAILAND

Katika jiji la Trat, dada mmoja alikutana na mwanamke mfanyabiashara na akamwuliza ikiwa kuna wakati ambapo vita vingeisha. Mwanamke huyo alisema kwamba alitamani wakati huo ufike na kwamba alikuwa ameathiriwa kibinafsi na migogoro mbalimbali wakati uliopita. Dada yetu alimsomea Waroma 15:4 na kumwonyesha mambo manne muhimu ambayo mstari huo unasema Neno la Mungu linatupatia: kutufundisha, uvumilivu, faraja, na tumaini. Kisha, dada yetu akamwonyesha broshua Furahia Maisha Milele! na akamwalika wapitie pamoja fungu la kwanza katika somo la kwanza la broshua hiyo. Mwanamke huyo sasa anajifunza kwa ukawaida na anafanya maendeleo mazuri.

Tukiwa undugu wa ulimwenguni pote, tunamshukuru Yehova kwa kubariki jitihada zetu za kushiriki na wengine ahadi yake yenye kupendeza ya kukomesha vita milele na ya kuwafanya wanadamu “[wafurahie] kwelikweli wingi wa amani.”​—Zaburi 37:11.

Picha zifuatazo zinaonyesha ndugu na dada kutoka nchi mbalimbali wakishiriki kwa shangwe katika kampeni na kuwaalika watu kwenye hotuba ya pekee mwezi Septemba 2025.