Tangu vita vilipoanza nchini Ukrainia Februari 2022, nchi hiyo imekumbwa na ghasia na machafuko. Watu wengi wameathiriwa na vita hivyo, kutia ndani Mashahidi wa Yehova 97,000 wanaoishi nchini humo. Kufikia sasa, jumla ya ndugu na dada zetu 65 wamekufa kutokana na vita hivyo kutia ndani dada zetu wawili wenye umri mkubwa waliokufa hivi karibuni.

Oktoba 26, 2025, Dada Oleksandra Nesmashna, mwenye umri wa miaka 87, aliuawa bomu lilipotupwa na kuangukia nyumba yake katika mji wa Kostiantynivka. Ndugu na dada wanaomjua wanasema alikuwa dada mwenye fadhili na mkaribishaji wageni. Mzee mmoja katika kutaniko lake alisema: “Oleksandra alikuwa mwenye bidii sana katika huduma. Alikuwa tayari kuwasaidia wengine bila ubinafsi. Na alimpenda Yehova sana kwa moyo wake wote.”

Wiki tatu hivi baadaye, Novemba 13, 2025, Dada Valentyna Oleksandrova, mwenye umri wa miaka 76, alikufa baada ya ndege ndogo isiyo na rubani kulipua kwa bomu gari alilokuwa akisafiria nje ya kijiji cha Borova. Valentyna alijulikana kuwa dada mchangamfu, aliyewajali wengine, na aliyetumia kila fursa kushiriki kweli za Biblia pamoja na wengine.

Kwa sasa, Halmashauri 18 za Kutoa Msaada pamoja na waangalizi wa mzunguko na wazee wa makutaniko, wanatoa msaada wa kiroho na wa kimwili kwa ndugu na dada zetu wote walioathiriwa na vita hivyo. Ivan, mwangalizi wa mzunguko anayesaidia katika kazi hii ya kutoa msaada, anasema hivi: “Wengine wamepoteza nyumba zao au wapendwa wao. Lakini kinachonigusa moyo zaidi ni kuona jinsi wanavyoendelea kumtegemea Yehova. Licha ya kukabili hali ngumu kwa miaka kadhaa sasa, ndugu na dada zetu wameazimia kuendelea kumtumaini Yehova kikamili.”

Tukiwa undugu wa ulimwenguni pote, tunahuzunishwa sana na vifo vya ndugu na dada zetu nchini Ukrainia. Tunasali kwamba Yehova aendelee ‘kufuta kabisa machozi’ ya wote walioathiriwa na vita hivyo tukiwa na uhakika kwamba hivi karibuni “atameza kifo milele.”​—Isaya 25:8.