Kuanzia Oktoba 6 hadi Novemba 2, 2025, Mashahidi wa Yehova walifanya kampeni ya pekee ya kuhubiri jijini Birmingham. Jiji hilo ni la pili kwa ukubwa nchini Uingereza, likiwa na idadi ya watu milioni 1.1. Ndugu na dada 1,700 hivi kutoka Uingereza na Wales walialikwa kujiunga na makutaniko 35 katika jiji hilo ili kushiriki katika kampeni hiyo. Waliposhiriki katika mahubiri ya umma na ya nyumba kwa nyumba, lengo lao lilikuwa kuanzisha mafunzo ya Biblia. Matokeo ni kwamba, zaidi ya watu 1,000 walikubali kujifunza Biblia.

Ndugu wawili walikutana na mwanamume Mpunjabi walipokuwa wakihubiri nyumba kwa nyumba. Kisha, wakamwonyesha video katika lugha yake. Alisisimka sana. Halafu, wakamwonyesha mistari kadhaa ya Biblia katika Kipunjabi na wakamweleza faida za kujifunza Biblia. Mwanamume huyo alipoonyesha upendezi, ndugu zetu walizungumzia somo la kwanza la broshua Furahia Maisha Milele! Mwanamume huyo alitamani kujifunza mengi zaidi, kwa hiyo, wakafanya mipango ili atembelewe na ndugu wa eneo hilo.

Katika kisa kingine, ndugu wawili walikutana na mwanamume na wakamwonyesha video Kwa Nini Ujifunze Biblia? Baada ya kutazama video hiyo, mwanamume huyo alisema kwamba alitamani kumkaribia Mungu, lakini dini yake haikuwa ikimsaidia kufanya hivyo. Kwa fadhili, ndugu hao walimhakikishia kwamba Mungu anawaalika watu wote wamkaribie. Walimwonyesha jinsi funzo la Biblia linavyofanywa na wakamwalika kwenye mikutano ya kutaniko iliyofuata. Mwanamume huyo alihudhuria mikutano na kusikiliza kwa makini programu yote. Baada ya mkutano, mwanamume huyo alieleza kwamba alifurahi sana kuhudhuria mkutano huo na alithamini jinsi Biblia ilivyofafanuliwa waziwazi. Alifurahia sana upendo ambao ndugu na dada walimwonyesha hivi kwamba alibaki hata baada ya programu kuisha ili kuzungumza na akina ndugu. Alisema hivi alipokuwa akiondoka: “Nimefurahi sana kukutana nanyi. Tuonane wiki ijayo.”

Tunashangilia sana tunapoona jinsi Yehova anavyowabariki ndugu na dada zetu wanapoendelea kufanya “mambo yote kwa ajili ya habari njema.”​—1 Wakorintho 9:23.