Kama ilivyoripotiwa katika sehemu ya “Habari” kwenye jw.org Mei 12, 2023, maelfu ya watu wameuawa au kujeruhiwa katika mapigano makali ambayo yamekuwa yakiendelea baina ya vikundi viwili kwenye mji mkuu wa Sudan, yaani, Khartoum. Baadhi ya ndugu na dada zetu walioishi Khartoum na katika maeneo yaliyo karibu na Khartoum walifanya uamuzi wa kibinafsi wa kukimbilia maeneo mengine. Walipokuwa katika harakati za kukimbia, walipata nguvu na kitia-moyo kupitia chakula cha kiroho kinachotoka kwenye tengenezo la Yehova.

Kwa mfano, siku kadhaa baada ya mzozo huo kuanza, Ajuja, dada mwenye umri wa miaka 23 ambaye ni painia kutoka Khartoum, alihudhuria mkutano uliofanywa mtandaoni, na makala ya Mnara yenye kichwa “Tunzeni Akili Zenu, Iweni Waangalifu!” ilizungumziwa. Anasema: “Makala hiyo ilinikumbusha kwamba mambo yanayoendelea katika eneo letu yalikuwa yametabiriwa katika Biblia. Hicho ndicho kitia-moyo nilichohitaji wakati huo.” Hali zilipozidi kuwa mbaya zaidi, Ajuja aliamua kukimbilia jiji lingine. Alisema: “Nilipokuwa safarini, nyimbo zetu za kutungwa na rekodi nyingine za kusikiliza zilinitia moyo sana. Nilikuwa nikisali na kumwomba Yehova atusaidie tufike salama.” Ajuja alifika salama na alikaribishwa vizuri na ndugu na dada walio Kassala.

Eli, ndugu mwenye umri wa miaka 24 ambaye ni mzee wa kutaniko na pia painia, alikimbilia mji wa Kosti ulio umbali wa kilomita 330 kutoka El Haj Yousif, jiji aliloishi. Jiji hilo liko karibu na Khartoum. Alikaribishwa na ndugu na dada na walimpa chakula na mahali pa kuishi. Eli anapotafakari juma lile alilokimbia, anakumbuka kwamba kila aliposoma andiko la siku alitiwa moyo sana. Kwa mfano, Zaburi 91:2 ilimkumbusha Eli umuhimu wa kumtumaini Yehova na kumfanya awe kimbilio na ngome yake. Eli anasema: “Ulimwengu huu wenye misukosuko hauna amani ya kweli, na viongozi wa kisiasa na wa kijeshi hawana uwezo wa kusuluhisha matatizo yetu. Tunaweka tumaini letu katika Ufalme wa Mungu ambao utasuluhisha matatizo yote ya wanadamu.”

Tia pamoja na mke wake, Julia, ni mapainia kutoka Omdurman, eneo lililo karibu na Khartoum. Mapigano yalipozidi kuongezeka, walikumbuka Mnara mmoja wa hivi karibuni uliozungumzia jinsi Mkristo anavyoweza kufanya maamuzi mazuri ya kibinafsi na kuyatekeleza bila kukawia. Kwa kuwa walijionea jinsi hali ilivyozidi kuwa mbaya katika jiji waliloishi, Tia na Julia waliamua kuhama jiji hilo haraka iwezekanavyo. Walifika eneo lingine wakiwa salama na ndugu na dada waliwakaribisha kwa uchangamfu. Kwa kweli, Tia na Julia walithamini sana habari waliyokuwa wamesoma katika Mnara ule. Julia anasema hivi: “Tunajivunia kuwa sehemu ya tengenezo hili linaloongozwa na upendo na linalojali. Ni kweli kwamba mkono wa Yehova si mfupi usiweze kuokoa.”

Inapendeza kwamba ndugu na dada wote waliotajwa hapo juu walianza mara moja ratiba zao za kiroho katika maeneo waliyofikia. Walishiriki kwa bidii katika mikutano, huduma ya shambani, na hata kuanzisha mafunzo ya Biblia. Utendaji wote huo wa kiroho pamoja na kushirikiana kwa ukaribu na ndugu na dada walio katika makutaniko hayo mapya kumewasaidia kuwa imara na kuwa na shangwe.

Inatia moyo kuona jinsi ndugu na dada zetu nchini Sudan wanavyoendelea kumtegemea Yehova na kutegemea Maandiko ili kupata faraja na tumaini.​—Waroma 15:4, 5.