Mwaka huu wa 2023, miaka 75 imetimia tangu Mashahidi wa Yehova walipoanza kutafsiri machapisho yanayotegemea Biblia katika lugha ya Sinhala, lugha inayozungumzwa na watu wengi zaidi nchini Sri Lanka.

Mwanzoni, machapisho yetu yalichapishwa katika Kiingereza tu nchini Sri Lanka kwa kuwa Kiingeraza kilikuwa lugha rasmi ya nchi hiyo wakati wa ukoloni. Hata hivyo, katika mwaka wa 1948, chapisho The Joy of All the People lilitolewa katika lugha ya Sinhala. Hilo lilikuwa chapisho la kwanza kutolewa katika lugha hiyo. Mwaka mmoja tu baada ya kijitabu hicho kutolewa, idadi ya wahubiri nchini Sri Lanka iliongezeka maradufu kutoka wahubiri 12 hadi 25.

Katika mwaka wa 1953, kijitabu Basis for Belief in a New World na pia kitabu The Truth Shall Make You Free vilitolewa katika lugha ya Sinhala. Miaka michache baadaye, katika mwezi wa Machi 1958, ndugu zetu walipiga hatua kubwa katika kazi ya utafsiri—walitoa toleo la kwanza la Mnara wa Mlinzi katika lugha ya Sinhala.

Kilele cha kazi ya utafsiri wa lugha ya Sinhala kilifika mwaka wa 2009. Katika mwaka huo Ndugu Stephen Lett, mshiriki wa Baraza Linaloongoza alitembelea Sri Lanka na akatangaza kutolewa kwa Biblia Takatifu—Tafsiri ya Ulimwengu Mpya katika lugha ya Sinhala.

Ndugu mmoja aliyehudhuria siku hiyo alisema: “Nilipopokea nakala yangu ya Tafsiri ya Ulimwengu Mpya katika lugha ya Sinhala, moyo wangu ulijaa shukrani kwa Yehova, Mfundishaji wetu Mkuu. Tafsiri hii ni rahisi kusoma na kuelewa na hivyo inafanya iwe rahisi kwangu kuona jinsi ninavyoweza kutumia habari hizo maishani mwangu.”

Ni wazi kwamba Yehova anawabariki wahubiri 4,839 walio katika makutaniko 63 ya lugha ya Sinhala na pia wahubiri wote 7,121 walio nchini Sri Lanka. Tunajua kwamba Yehova ataendelea kuwabariki wanapoendelea kuzungumza na pia kufundisha wengine “lugha safi.”​—Sefania 3:9.