Mwishoni mwa Septemba 2018, Mashahidi wa Yehova nchini Rwanda walipiga hatua muhimu katika jitihada zao za kueneza ujumbe wa Biblia katika lugha za eneo la ofisi yao ya tawi: walianza kutafsiri katika Lugha ya Ishara ya Rwanda (RWS). Jitihada hizo zitawanufaisha ndugu na dada viziwi 113 hivi nchini Rwanda na kuwapa wahubiri vifaa wanavyohitaji ili kuwafikia watu 30,000 hivi ambao ni viziwi na walio na matatizo ya kusikia nchini humo.

Kikundi cha kutafsiri katika RWS kimetafsiri broshua Msikilize Mungu Uishi Milele, video fupi Kwa Nini Ujifunze Biblia?, na trakti nyingi kati ya zilizo katika Sanduku Letu la Vifaa vya Kufundishia. Machapisho hayo yatapatikana kwenye tovuti yetu rasmi hivi karibuni.

Kikundi cha kutafsiri katika RWS kinafanya kazi katika jengo lililo umbali wa dakika tano kutoka ofisi ya tawi ya Rwanda iliyoko Kigali. Kikundi hicho kimefanyizwa na ndugu wawili na dada wawili. Ndugu mmoja kati yao ni kiziwi. Kila mshiriki wa timu hiyo anaielewa vizuri lugha ya ishara na wote walizoezwa kwa majuma manne katika mtaala uliokusudiwa kuwafundisha kanuni za kutafsiri.

Mmoja wa watafsiri hao, Rwakibibi Jean Pierre, anaeleza sababu inayofanya lugha ya ishara iwe na changamoto ambazo hazipo mtu anapotafsiri lugha ya kuandika: “Viziwi huwasilisha mawazo yao kwa kutumia ishara za mikono na uso, kwa hiyo, watafsiri wa lugha ya ishara hubadili maneno kuwa video kwa kutumia mbinu ya pekee inayoitwa ramani ya mawazo. Tunatumia ubao mweupe kubadili maneno ya Kiingereza kuwa michoro. Michoro hiyo humwelekeza mtafsiri anapowasilisha mawazo ya Kiingereza katika lugha ya ishara. Ili kuhakikisha kwamba habari iliyotafsiriwa inaeleweka wazi na ni sahihi, jopo la Mashahidi ambao ni viziwi huja kuchanganua habari hiyo na kutoa maoni yao.”

Bw. Augustin Munyangeyo, mwenyekiti wa baraza la Umoja wa Kitaifa wa Viziwi Nchini Rwanda, shirika la kitaifa ambalo si la serikali linalotetea haki za Wanyarwanda viziwi, alisema hivi kuhusu kazi ya Mashahidi ya kutafsiri katika RWS: “Tunawapongeza sana Mashahidi wa Yehova kwa kuandaa elimu ya kidini kupitia Biblia na video zilizotayarishwa katika Lugha ya Ishara ya Rwanda.”

Kufikia leo, Mashahidi wa Yehova wanatafsiri katika zaidi ya lugha 90 za ishara ulimwenguni pote, na wametayarisha programu inayopatikana bila malipo inayoitwa JW Library Sign Language^®, ambayo pia inawaruhusu watumiaji kupata machapisho ya Biblia katika lugha za ishara zaidi ya 90. Kupatikana kwa machapisho hayo ya lugha nyingi za ishara kunawasaidia ndugu na dada ulimwenguni pote kutangaza habari njema “kwa kila taifa na kabila na lugha na watu.”—Ufunuo 14:6.