Majuma mawili mfululizo, washiriki wa Halmashauri ya Tawi ya Myanmar walitangaza kutolewa kwa Biblia—Habari Njema Kulingana na Mathayo katika lugha mbili nchini humo. Septemba 3, 2023, Ndugu Sai Hlua alitangaza kutolewa kwa Biblia ya Kichin (cha Hakha). Kisha, Septemba 10, Ndugu Clifton Ludlow alitangaza kutolewa kwa Biblia ya Kimizo.

Kichin (cha Hakha)

Tangazo la kutolewa kwa kitabu hicho lilitolewa katika programu ya pekee iliyorekodiwa mapema na kusambazwa katika makutaniko yanayozungumza Kichin (cha Hakha) kotekote nchini Myanmar kwa kutumia JW Box. Jumla ya watu 397 walitazama programu hiyo katika Majumba ya Ufalme kotekote nchini Myanmar. Baada ya programu hiyo, nakala zilizochapishwa za Biblia hiyo ziligawiwa wote waliohudhuria. Biblia hiyo ilitolewa pia katika mifumo ya kidijitali na rekodi za sauti.

Watu wengi wanaozungumza Kichin (cha Hakha) wanaishi katika Milima ya Chin iliyo kaskazini-magharibi mwa Myanmar. Zaidi ya watu 200,000 ulimwenguni wanazungumza Kichin (cha Hakha). Zaidi ya wahubiri 220 nchini Myanmar wanatumikia katika makutaniko matano na kikundi kimoja cha Kichin (cha Hakha). Pia kuna kutaniko moja na kikundi kimoja nchini Marekani.

Ndugu mmoja alisema hivi: “Ninatazamia kwa hamu kutumia tafsiri hii mpya ya kitabu cha Mathayo katika huduma kwa sababu imeandikwa katika njia inayoeleweka kwa rahisi na watu wote wanaozungumza Kichin (cha Hakha).”

Kimizo

Programu ya kutangaza kutolewa kwa Biblia hiyo ilirekodiwa mapema na kuonyeshwa katika Majumba mawili ya Ufalme nchini Myanmar. Baada ya hotuba, wote 173 waliohudhuria walipata nakala zilizochapishwa za Biblia hiyo, ambayo pia ilitolewa katika mifumo ya kidijitali na rekodi za sauti.

Kimizo, ambacho zamani kilijulikana kama Kilushei, kinazungumzwa hasa Bangladesh, Myanmar, na katika jimbo la Mizoram nchini India. Ulimwenguni pote, lugha hiyo inazungumzwa hasa na watu milioni 1.3 hivi. Wahubiri 250 hivi wanatumikia katika makutaniko matano ya Kimizo nchini Myanmar na India.

Hapo awali, vikundi vya utafsiri vya Kichin (cha Hakha) na Kimizo vilifanyia kazi kwenye ofisi ya utafsiri (RTO) iliyokuwa kwenye Milima ya Chin. Hata hivyo, Aprili 2021 walilazimika kuhama kwa sababu ya vita vya wenyewe kwa wenyewe. Kwa sasa, watafsiri hao wanafanya kazi katika RTO iliyofunguliwa hivi karibuni iliyoko Yangon, kilomita 4.5 hivi kutoka kwenye ofisi ya tawi ya Myanmar.

Tunashangilia pamoja na ndugu na dada wanaozungumza Kichin (cha Hakha) na Kimizo na wengine wengi ambao sasa wanaweza kusoma “habari njema yenye utukufu kuhusu Kristo” katika lugha yao wenyewe.​—2 Wakorintho 4:4.