Ugonjwa wa virusi vya corona (COVID-19) ulipofanya watu wazuiwe kutembelea magereza nchini Marekani, mamia ya Mashahidi wa Yehova waliacha kwenda kupeleka machapisho ya Biblia na kuongoza mafunzo ya Biblia kama walivyokuwa wakifanya kwa ukawaida. Hilo linamaanisha maelfu ya wafungwa hawangeweza tena kupata faraja kutoka kwa Biblia. Lakini ndugu zetu wamebadili mbinu zao kupatana na tahadhari za COVID-19 ili kuendelea kuhubiri gerezani.

Ndugu Dan Houghton, anayesaidia kuratibu mahubiri ya gerezani katika eneo la ofisi ya tawi ya Marekani anasema hivi: “Hangaiko letu lilikuwa kwa ajili ya wale wanaotegemea ziara zetu ili kupata elimu ya kiroho. Wanatuhitaji sasa kuliko wakati mwingine wowote.”

Kwa mfano, Ndugu Micah Seierstad aliwasiliana na maofisa wa gereza huko Vacaville, California, kuomba ruhusa ya kutuma video za programu ya JW Broadcasting katika gereza hilo. Alishangaa maofisa wa gereza walipomwomba aandae video zitakazoonyeshwa katika kituo chao cha televisheni kilichounganishwa katika magereza 33 ya jimbo la California. Alipofanya hivyo, Kusanyiko la Eneo la “Shangilieni Sikuzote!” la mwaka 2020 lilionyeshwa mara tatu kila siku katika visehemu vya dakika 28, kwa watazamaji 130,000 hivi.

Ndugu Seierstad anasema hivi: “Inastaajabisha kuuona mkono wa Yehova ukitenda. Akitaka jambo fulani lifanywe, hakuna kitu kinachoweza kumzuia!”

Ndugu zetu walipata habari kwamba wasimamizi wa Gereza la Mji wa Sarasota katika jimbo la Florida walikuwa wakitafuta “vitabu vya kuwatia moyo” wafungwa ili kuwasaidia kukabiliana na mkazo mwingi unaotokana na vizuizi vya ugonjwa wa corona. Kwa hiyo, ndugu zetu waliwajulisha kwamba wanaweza kuwapa Biblia na machapisho mbalimbali yanayotegemea Biblia katika Kiingereza na Kihispania. Wasimamizi wa gereza hilo walikubali. Ndugu zetu walipanga pia kujifunza Biblia kupitia video iliyounganishwa kwenye mtandao. Mfungwa mmoja alimwandikia mwalimu wake hivi kuhusu funzo hilo la Biblia linaloongozwa kwa njia hiyo: “Mimi hutazamia kwa hamu pindi ambazo tutajifunza. Pindi hizo hunitia moyo kuisoma Biblia. Ninafikiria kuhusu wakati ujao kwa njia tofauti sana.”

Tunafurahi kwamba hakuna kitu kinachoweza kumzuia Baba yetu mwenye upendo, Yehova, kuwasaidia watu wanaotaka kumjua, hata iwe ni ugonjwa wa corona au hata kuta za gereza.—Zaburi 139:7-10.