Kuanzia Aprili 24 hadi 26, 2025, maelfu ya wenyeji wa asili wa Amerika kutoka mamia ya makabila yanayoishi katika sehemu mbalimbali za Amerika ya Kaskazini, walikusanyika kwa ajili ya mkutano wao wa kila mwaka huko Albuquerque, New Mexico, Marekani. Walikutanika ili kufurahia nyimbo zao za asili, kucheza dansi, na kufanya shughuli nyingine za kitamaduni pamoja. Mashahidi wa Yehova pia waliweka kibanda cha maonyesho. Waliwaonyesha watu programu yetu ya kujifunza Biblia na machapisho yetu yanayotegemea Biblia katika lugha ya Navajo na lugha zingine 26 za wenyeji wa asili wa Amerika.

Mwanamume mmoja alikaribia kibanda hicho na kuwauliza akina ndugu ikiwa wao walikuwa Mashahidi wa Yehova. Baada ya kuhakikisha kwamba wao ni Mashahidi wa Yehova, mwanamume huyo alisema, “Hata sijui Yehova ni nani.” Ndugu zetu walifurahi kumfafanulia kwamba Yehova ni jina la Muumba na kwamba wao walikuwa hapo ili kuwasaidia watu wamjue Muumba wao kibinafsi. Mwanamume huyo alifurahi kujua kwamba angeweza kujifunza kumhusu Yehova katika lugha yake ya asili ya Navajo na akakubali trakti yenye kichwa Unaweza Kumtumaini Muumba! (You Can Trust the Creator!) Pia, alitaka kujua mengi zaidi kuhusu programu yetu ya kujifunza Biblia.

Wanawake wawili vijana walivutiwa mara moja na bango lililosema “Pata Habari Katika Lugha Yako Hapa.” (Tazama picha.) Dada mmoja alipogundua kwamba wanawake hao walikuwa wamelelewa kwenye eneo lililotengewa watu wenye asili ya Navajo, aliwasaidia kupata taarifa kwenye jw.org katika lugha ya Navajo. Isitoshe, dada yetu aliwaeleza kuhusu programu yetu ya kujifunza Biblia na jinsi ambavyo ingewasaidia kupata majibu ya maswali muhimu zaidi maishani. Wanawake hao wawili walikubali funzo la Biblia.

Kwa ujumla, watu 96 ambao ni wenyeji wa asili wa Amerika walionyesha hamu ya kutaka kujifunza Biblia ili wajue mengi kumhusu Muumba. Tunafurahi kusikia masimulizi mazuri ambayo yanatutia moyo tuendelee kutangaza habari njema kwa “kila taifa na kabila na lugha na watu.”​—Ufunuo 14:6.