Ulikuwa mwaka wa 1935. Joseph F. Rutherford, ambaye wakati huo alikuwa msimamizi wa Watchtower Society, alikuwepo ujenzi ulipoanza wa jengo lililo 1228 Pensacola Street, Honolulu, Hawaii. Jengo hilo dogo lilikuwa la pekee kwa sababu lilikuwa la kwanza ulimwenguni pote kuitwa “Jumba la Ufalme.” Jengo hilo pia liliwasaidia watu wengi kuanza kumtumikia Yehova katika miaka 80 ambayo ilifuata. Leo, miaka 85 baadaye, Jumba la Ufalme la Pensacola Street linatumiwa na makutaniko manne yanayofanya mikutano katika lugha tano, kutia ndani Kipijini cha Hawaii. a

Februari 11 hadi 15, 2020, kabla ya ugonjwa wa virusi vya corona, ndugu zetu waliwaalika watu katika eneo hilo, maofisa wa serikali, na walimu kutembelea jumba hilo baada ya kulirekebisha upya kabisa. Wageni walitembezwa kwenye jengo hilo, wakaona maonyesho ya kihistoria, na kusikiliza maelezo kutoka kwa akina ndugu waliosimulia utendaji wa kisasa wa tengenezo la Yehova. Tukio hilo lilikamilika Februari 16 wakati ambapo Ndugu David H. Splane, mshiriki wa Baraza Linaloongoza la Mashahidi wa Yehova alipotoa hotuba ya kuweka wakfu jengo hilo.

Dada mmoja aliyesaidia katika matayarisho ya programu hiyo alisema hivi: “Hata ingawa kuwaalika watu kutembelea Jumba hili si kuhubiri, tunahisi kwamba ushahidi mkubwa ulitolewa kwa wale ambao kwa kawaida huenda hawangewahi kujua kuwahusu Mashahidi wa Yehova.”

Tukio hilo liliwasaidia ndugu na dada zetu kuelewa zaidi urithi mkubwa wa kiroho uliopo katika Visiwa vya Hawaii na kujionea utimizo wa maneno “katika visiwa vya bahari watalitukuza jina la Yehova Mungu wa Israeli.”—Isaya 24:15.