Agosti 18, 2023, Ndugu Kenneth Cook, Jr., mshiriki wa Baraza Linaloongoza, alitangaza kutolewa kwa Biblia Takatifu—Tafsiri ya Ulimwengu Mpya katika Kichichewa. Biblia hiyo ilitolewa katika siku ya kwanza ya Kusanyiko la Eneo la 2023 lenye kichwa “Iweni na Subira”! Kusanyiko hilo lilifanywa katika Jumba la Kusanyiko la Lilongwe lililo jijini Lilongwe, Malawi. Wahudhuriaji walipata nakala zilizochapishwa na pia wangeweza kuipakua Biblia hiyo kupitia JW Box.

Hotuba ya Ndugu Cook ilipeperushwa kupitia kituo cha satelaiti cha JW na hivyo wengi walifaulu kuisikiliza. Waliosikiliza hotuba hiyo wanatia ndani wahudhuriaji waliokuwa kwenye viwanja viwili vya mpira, kimoja kikiwa upande wa kusini na kingine katikati mwa nchi. Isitoshe, hotuba hiyo ilisikilizwa pia kwenye makusanyiko mengine na kwenye Majumba mengi ya Ufalme nchini Malawi. Vilevile, hotuba hiyo ilisikilizwa nchini Msumbiji katika baadhi ya Majumba ya Ufalme yaliyo kwenye maeneo yenye watu wanaozungumza Kichichewa. Kulikuwa na jumla ya watu 77,112 waliosikiliza hotuba hiyo kwenye vile viwanja vya mpira na pia kwenye makusanyiko. Idadi hiyo haitii ndani maelfu ya watu waliosikiliza hotuba hiyo kwenye Majumba ya Ufalme.

Kichichewa ndio lugha ya taifa ya Malawi na zaidi ya watu milioni kumi wanazungumza lugha hiyo nchini humo. Lugha hiyo inazungumzwa pia katika sehemu za Msumbiji, Afrika Kusini, Zambia, na Zimbabwe. Tafsiri ya Ulimwengu Mpya ya Maandiko ya Kigiriki ya Kikristo ilitolewa katika Kichichewa mwaka wa 2006, na baadaye katika mwaka wa 2010 Tafsiri ya Ulimwengu Mpya ilitolewa ikiwa nzima. Sasa, ndugu na dada zetu wamefurahia sana kupata Biblia Takatifu—Tafsiri ya Ulimwengu Mpya iliyorekebishwa.

Mhubiri mmoja alisema hivi: “Watu wengi tunaokutana nao katika huduma wana tafsiri za Biblia zinazotumia lugha iliyopitwa na wakati. Tunapoomba watu wasome mstari fulani kwenye Biblia zao, mara nyingi wanashindwa kuelewa wanachosoma. Lakini Tafsiri ya Ulimwengu Mpya iliyorekebishwa ni tofauti kwa sababu ni rahisi kuelewa. Ninatazamia kwa hamu kuitumia katika huduma!”

Hatuna shaka kwamba Biblia Takatifu—Tafsiri ya Ulimwengu Mpya iliyorekebishwa itawasaidia ndugu na dada zetu wanaozungumza Kichichewa bila kusahau watu wanaopendezwa ili wote waendelee ‘kupendezwa na sheria ya Yehova.’​—Zaburi 1:2.