Mapema katika mwezi wa Machi 2023, zaidi ya watu 21,000 walihudhuria Maonyesho ya Vitabu vya Kilatvia jijini Riga, Latvia. Hiyo ilikuwa mara ya saba kwa ndugu na dada zetu kushiriki maonyesho hayo lakini mara ya kwanza tangu janga la COVID-19. Walisisimuka sana kuonyesha toleo kamili la Biblia Takatifu—Tafsiri ya Ulimwengu Mpya katika Kilatvia, lililotolewa mwaka wa 2020.

Fikira nyingi zilielekezwa kwenye jina la Mungu, Yehova. Wageni walishangaa kujua kwamba jina Yehova lilitumiwa katika tafsiri ya kwanza ya Biblia ya Kilatvia iliyotolewa mwaka wa 1689. Walishangaa hata zaidi walipoonyeshwa kwamba Tafsiri ya Ulimwengu Mpya imelirudisha jina la Mungu katika zaidi ya sehemu 7,000 katika Biblia yote.

Baadhi ya wageni walivutiwa sana na sehemu nyingine za Tafsiri ya Ulimwengu Mpya. Mwanamume mmoja anayefanya kazi katika kampuni ya uchapishaji alizungumzia jinsi Biblia hiyo ilivyotengenezwa kwa vifaa vya hali ya juu. Alisema ni wazi kwamba Biblia hiyo ilitayarishwa itumiwe kila siku.

Baada ya kupokea nakala ya kibinafsi kwenye kibanda hicho cha Mashahidi, mgeni mwingine alisema kwamba anavutiwa sana na lugha ya kisasa ambayo ni rahisi kusoma iliyotumiwa katika Tafsiri ya Ulimwengu Mpya. Alisema kwamba alikuwa amejaribu kusoma Biblia mara kadhaa lakini akashindwa kwa sababu ilikuwa vigumu kuelewa tafsiri hizo nyingine. Sasa anatazamia kwa hamu kusoma Tafsiri ya Ulimwengu Mpya pamoja na binti yake. Kufikia mwisho wa tukio hilo la siku tatu, zaidi ya nakala 130 za Tafsiri ya Ulimwengu Mpya ya Kilatvia zilikuwa zimetolewa.

Wale walioshiriki maonyesho hayo ya vitabu walifurahi sana kuwasaidia wengine kujifunza mengi zaidi kuhusu Biblia na Mtungaji wake. Dada mmoja alisema hivi kwa furaha: “Sijawahi kuwasaidia watu wengi kadiri hiyo kulifahamu jina la Yehova katika siku chache hivyo!”

Kwa sasa, kuna wahubiri 2,100 nchini Latvia. Tunashangilia kwamba wao, pamoja na wengine wengi ambao wanapendezwa na Neno la Mungu, wanafaidika kutokana na tafsiri hii ya kisasa na wanamkaribia Yehova.​—Yakobo 1:17.