Maofisa wanaosimamia maeneo ambapo makusanyiko hufanyiwa nchini Korea Kusini wamelipongeza tengenezo letu kwa kupanga programu ya kusanyiko la 2020 lifanyiwe mtandaoni badala ya katika uwanja wa michezo. Maofisa hao walitupongeza kwa kufikiria afya ya umma huku tukidumisha programu yetu ya kawaida ya elimu ya kiroho. Pesa zote zilizotolewa mapema kwa ajili kutumia maeneo hayo ya kusanyiko zimerudishwa.

Ofisa mmoja anayesimamia uwanja mmoja jijini Seoul alisema hivi: “Kama ilivyotarajiwa, Mashahidi wa Yehova wamefanya uamuzi wenye hekima. Tunawapenda sana Mashahidi. Nikiwa mshiriki wa jamii yetu, ninajiuliza ikiwa kuna dini nyingine inayofanya mambo mengi mema katika jamii kama wao.” Alieleza hivi: “Mashahidi wa Yehova hutanguliza mahitaji ya wengine. Tunasikitika kwamba hawatakuwa na kusanyiko lao katika uwanja wetu mwaka huu. Lakini tunatumaini kwamba wataendelea kulitumia wakati ujao.”

Katika jiji la Suwon, ofisa mmoja alisema hivi: “Kwa miaka 35 iliyopita Mashahidi wa Yehova wametumia eneo hili nami nimewashukuru sana kwa kuliheshimu, wanalitumia kana kwamba ni mali yao. Lakini sasa ninawashukuru hata zaidi kwa kutii maamuzi yaliyofanywa na serikali ili kuzuia kuenea kwa ugonjwa wa virusi vya corona (COVID-19). Inapendeza kuona jinsi wanavyowafikiria wengine. Ninatazamia kuwaona tena Mashahidi wa Yehova mwaka ujao.”

Ofisa wa uwanja wa ndege ulio karibu na eneo moja la kusanyiko alisema hivi: “Mwaka wa 2018 na 2019, tuliona jinsi Mashahidi wa Yehova walivyo na utaratibu mzuri na jinsi wanavyotenda upesi kupatana na maombi yetu. Uamuzi wa kufuta tukio hilo mwaka huu ulifanywa kwa kuwajali wengine, na hilo limenifurahisha sana.” Aliongezea hivi: “Tunahisi kwamba ikiwa watu wote watakuwa kama Mashahidi, mambo yangekuwa mazuri sana.”

Tukiwa watu wa Yehova, tunashukuru kwamba tumefundishwa jinsi ya kuwapenda jirani zetu na upendo huo unaonekana katika nyakati hizi ngumu.—Mathayo 22:39.