Aprili 23, 2023, Biblia—Kitabu cha Mathayo kilitolewa katika Lugha ya Ishara ya Kichina (CSL) katika programu iliyofanywa nchini Korea Kusini. Hiki ndicho kitabu cha kwanza cha Biblia kuwahi kutolewa katika CSL. Karibu watu 200 kutoka makutaniko mawili ya CSL yaliyo nchini Korea Kusini walikuwepo. Kitabu hicho kinaweza kupakuliwa kwenye jw.org na kwenye programu ya JW Library Sign Language.

Kikundi cha utafsiri kilijitahidi kutafsiri kitabu hicho cha Biblia katika lugha rahisi, inayoeleweka, na iliyo wazi. Mtafsiri mmoja alisema hivi kuhusiana na jambo hilo: “Kulikuwa na watafsiri watatu katika kikundi cha utafsiri na wawili kati yao ni viziwi, kwa hiyo mara nyingi tulizungumza kuhusu jinsi viziwi wanavyofikiri. Kufikiria mtazamo wa viziwi kulituwezesha kutafsiri kwa njia bora.”

Mtafsiri mwingine alisema: “Kushiriki katika kazi ya kutafsiri kitabu hiki, kumenisaidia kuelewa waziwazi mambo ambayo Yesu alifanya, mambo aliyopitia, na mambo aliyofundisha alipokuwa duniani.”

Mhubiri ambaye ni kiziwi aliyehudhuria programu hiyo alisema: “Kabla ya kitabu hiki kutolewa, ni mistari michache tu iliyokuwa imetafsiriwa katika CSL. Kwa sababu hiyo, ni kana kwamba tuliona sehemu ndogo tu ya picha. Lakini kwa kuwa sasa kitabu cha Mathayo kimetolewa, ninatazamia kwa hamu sana kuona picha kamili.”

Mhubiri mwingine ambaye pia ni kiziwi alisema: “Machapisho ya lugha ya ishara yanayoandaliwa na tengenezo la Yehova na pia kutolewa kwa kitabu cha Mathayo katika lugha ya CSL, kumenisaidia kutambua kwamba Yehova anataka sana kuwasaidia viziwi na anawapenda sana.”

Tunamshukuru sana Yehova kwa kitabu hiki ambacho kitawasaidia ndugu na dada zetu waendelee kumwabudu kwa “roho na kweli.”​—Yohana 4:24.