Jumapili, Machi 26, 2023, programu ya pekee ya lugha kadhaa ilifanywa huko Cali, Kolombia. Kwa mara ya kwanza programu ya kusanyiko la mzunguko ya Kihispania ilitafsiriwa wakati uleule katika Kiguambiano na Kiemberá (Chamí). Zaidi ya watu 1,600 walihudhuria. Hiyo ilitia ndani watu 48 wanaozungumza Kiguambiano na 78 wanaozungumza Kiemberá (Chamí).

Nchini Kolombia, kuna zaidi ya watu 21,000 ambao lugha yao ya asili ni Kiguambiano na zaidi ya watu 77,000 ambao lugha yao ya asili ni Kiemberá (Chamí). Hapo awali, Majumba ya Kusanyiko nchini Kolombia hayakuwa na vifaa vya kutafsiri programu hizo moja kwa moja. Hivyo, washiriki wa lugha hizo za kiasili walilazimika kuhudhuria programu za kusanyiko za Kihispania hata ingawa hawakuelewa lugha hiyo vizuri.

Watu wanaozungumza lugha hizo za kiasili waliposikia kusanyiko hilo litafanywa katika lugha hizo, mara moja familia zilianza kuhifadhi pesa kwa ajili ya safari. Ilikuwa hivyo kwa familia ya Carrasco iliyo na watu wanane. Wanaishi katika eneo la mbali sana. Wanahitaji kutembea kwa saa tatu kisha kusafiri kwa basi kwa saa 12 ili kufika kwenye Jumba la Kusanyiko. Hata hivyo, umbali na gharama za safari hiyo hazikupunguza shangwe yao. Walianza kujitayarisha miezi kadhaa mapema kwa kutengeneza na kuuza bidhaa za kitamaduni ili kugharimia safari yao. Wakati wa kusanyiko, Henry, mwana wao mwenye umri wa miaka 12 alikuwa mmoja kati ya wahudhuriaji wawili wa lugha ya Kiemberá (Chamí) waliobatizwa. Mbali na wao, wahudhuriaji wawili wa lugha ya Kiguambiano walibatizwa.

Dada Adrianin Morales, mmoja wa wakalimani wa Kiguambiano katika kusanyiko hilo, alisema hivi: “Ilipendeza sana kuwa na kusanyiko lililotafsiriwa katika lugha yangu. Nilifurahi sana kujua kwamba kila mtu aliyehudhuria angeweza kusikia ujumbe wa Yehova katika lugha yake mwenyewe.”

Mkalimani mwingine wa Kiguambiano, Ndugu Diomedes Velasco, alisema hivi: “Nilipopewa mgawo wa kuwa mkalimani niliogopa sana. Lakini nilipojionea mambo makubwa ambayo Yehova anawafanyia watu katika lugha hizo za asili, nilijipa ujasiri. Lilikuwa pendeleo kushiriki katika mgawo huu kutoka kwa Yehova.”

Inapendeza sana kuona watu kutoka katika lugha zote wakisema: “Njooni, twendeni juu kwenye mlima wa Yehova.”​—Isaya 2:3.