Katika mwezi wa Agosti na wa Septemba 2024, Mashahidi wa Yehova walishiriki katika kampeni za pekee katika maeneo mbalimbali nchini Kanada. Ndugu na dada zetu walipata matokeo mazuri.

Kuhubiri Kaskazini mwa Kanada

Zaidi ya Mashahidi 800 wa Yehova walishiriki katika kampeni ya pekee ya kuhubiri kaskazini mwa Kanada. Baadhi ya ndugu na dada walisafiri kwenda Iqaluit, Nunavut, wengine wakaenda Yellowknife, iliyo kwenye Maeneo ya Kaskazini-Magharibi ya Kanada, na wengine Whitehorse, Yukon. Walipofika kwenye maeneo hayo, waligawanywa katika vikundi, kisha wakasafiri kwa ndege kwenda kwenye miji na vijiji 39 vilivyo mbali. Kwa kuwa maeneo hayo yanaweza kufikiwa tu kwa ndege, Mashahidi ambao ni marubani kutoka Kanada na Marekani walijitolea kuwapeleka. Katika kampeni hizo, watu 275 walisema kwamba wangependa kujifunza Biblia. Mipango ilifanywa ili kujifunza nao kwa simu au kupitia video mtandaoni.

Huko Yellowknife, dada mmoja alianzisha mazungumzo na mfanyakazi wa hoteli ambapo yeye na kikundi chake walikuwa wakiishi. Mfanyakazi huyo alisema kwamba anahangaishwa na hali mbaya zilizo ulimwenguni. Dada yetu alitumia fursa hiyo kumwonyesha broshua Furahia Maisha Milele! na kumweleza kuhusu ahadi za Biblia za wakati ujao. Mwanamke huyo alitamani kujua zaidi kuhusu ahadi hizo. Kwa hiyo, mipango ilifanywa ili kuendeleza mazungumzo kupitia video mtandaoni.

Kampeni Katika Lugha Mbalimbali

Katika majiji matatu nchini Kanada, ndugu na dada 600 hivi walishiriki katika kampeni nne za kuhubiri: kampeni ya Kiarabu jijini Montreal, ya Kichina cha Mandarini na Kiajemi jijini Vancouver, na ya Kipunjabi jijini Brampton, karibu na Toronto. Zaidi ya watu 100 walikubali kujifunza Biblia katika lugha hizo.

Dada wawili walipokuwa wakihubiri nyumba kwa nyumba, walibisha kwenye nyumba ya mwanamke kijana mwenye asili ya Kiarabu. Mwanamke huyo alikuwa ametoka tu kusali akimwomba Mungu amsaidie kuelewa kwa nini maisha yalikuwa magumu. Baada ya dada hao kumsomea andiko la Ufunuo 21:4 na kumweleza kwamba Mungu ataondoa uchungu na mateso, mwanamke huyo alianza kulia. Alifurahia kupata broshua Furahia Maisha Milele! na alitamani kujifunza Biblia.

Dada wawili walipokuwa wakisafiri kwenye basi jijini Vancouver, walikutana na mwanamke kutoka Iran. Mwanamke huyo alifurahi sana dada hao walipomsalimu kwa Kiajemi. Aliwaambia kwamba alikuwa ameanza kusoma Biblia miaka 15 iliyopita lakini hakuielewa. Dada hao walimweleza jinsi programu yetu ya kujifunza Biblia inavyoweza kumsaidia kujua mengi zaidi kuhusu Neno la Mungu. Mwanamke huyo alikubali kukutana nao siku iliyofuata na akaanza kujifunza Biblia.

Mambo hayo yanasisimua sana na tuna uhakika kwamba Yehova anathamini jinsi akina ndugu na dada zetu walivyojitahidi na kujidhabihu ili kushiriki katika kampeni hizo.​—Zaburi 110:3.