Mwaka wa 2024, ofisi ya tawi ya Kanada ilifungua maonyesho matatu kuhusu Biblia na historia ya kitheokrasi ya Mashahidi wa Yehova nchini humo. Maonyesho mawili kati ya hayo yanaonyesha jinsi ujumbe wa Biblia ulivyoenea nchini Kanada. Maonyesho ya tatu yanaonyesha jinsi Wanafunzi wa Biblia walivyovumilia majaribu makali waliyokabili mwaka wa 1914 hadi 1919.

Maonyesho ya kwanza yanaitwa “Nuru ya Kweli Yaangaza Nchini Kanada” na yanawasaidia wageni wanaotembelea ofisi hiyo ya tawi kujifunza kuhusu miaka 150 hivi ya historia ya Mashahidi wa Yehova nchini Kanada. Maonyesho hayo yana vifaa vya awali vilivyotumiwa na wanaume na wanawake wenye ujasiri waliofanya yote waliyoweza ili kuhubiri habari njema katika eneo hilo kubwa. Maonyesho hayo pia yanaonyesha jinsi Mashahidi wa Yehova walivyofaulu kuwahubiria habari njema watu wa tamaduni tofauti-tofauti. Walifanya hivyo kwa kutafsiri machapisho katika lugha mbalimbali, kutia ndani lugha za wenyeji wa asili wa Kanada.

Isitoshe, maonyesho hayo yana masimulizi mbalimbali yanayoeleza jinsi Mashahidi wa Yehova walivyovumilia hali ngumu kama vile kupigwa marufuku na kufungwa gerezani. Vilevile, yanaonyesha ushindi mbalimbali wa kisheria wa Mashahidi katika kesi muhimu zilizotetea haki yetu ya kuhubiri na kuhakikisha kwamba haki za msingi za raia wote wa Kanada zinazingatiwa. Ndugu mmoja alisema hivi baada ya kutembelea maonyesho hayo: “Nilipoona picha na kujifunza kuhusu ndugu na dada walioweka msingi wa ibada ya kweli nchini Kanada, nilichochewa kuiga ujasiri na uvumilivu wao maishani mwangu.”

Maonyesho ya pili yanaitwa “Neno la Mungu Wetu Linadumu Milele—Historia ya Biblia Nchini Kanada” na yana mkusanyo wa Biblia zilizotumiwa na wanafunzi wa Biblia wa mapema ambao walihubiri kotekote nchini Kanada. Biblia hizo zilitumiwa na vizazi kadhaa na ziliwasaidia watu wengi wanaozungumza lugha mbalimbali kujifunza kweli za Biblia.

Maonyesho hayo yana Biblia kadhaa ambazo ni muhimu katika historia ya kitheokrasi ya Kanada, kutia ndani Biblia nadra sana ya John Henry White. Tafsiri hii ilikuwa Biblia ya kwanza kuchapishwa ikiwa nzima nchini Kanada, na nakala zinazopatikana leo hazizidi kumi. Pia, Biblia za awali zinapatikana katika maonyesho hayo na zinaonyesha jitihada kubwa na za miaka mingi za kutafsiri Biblia katika lugha za asili kama vile, Kiinuktitut, Kimassachusett, Kimi’kmaq, Kimohawk, Kiojibwa, na Kikree cha Magharibi.

Maonyesho ya tatu yanaitwa “Kubaki Imara kwa Ujasiri Wakati wa Majaribu” na yanaeleza kuhusu utendaji na ujasiri wa Wanafunzi wa Biblia wa mapema mwishoni mwa miaka ya 1800. Pia, yanasimulia kuhusu changamoto nyingi walizokabili kuanzia Vita vya Kwanza vya Ulimwengu katika mwaka 1914 hadi mwaka wa 1919. Maonyesho hayo yanamalizia kwa kuonyesha jinsi changamoto hizo zilivyowaimarisha na kuwatayarisha Wanafunzi hao waaminifu wa Biblia kwa ajili ya kazi iliyokuwa mbele yao.

Ndugu Kevin Knaus, mshiriki wa Halmashauri ya Tawi ya Kanada, anasema hivi: “Maonyesho haya matatu yanaonyesha urithi wa kiroho wenye thamani wa Mashahidi wa Yehova nchini Kanada. Zaidi ya hilo, yanatusadikishia kwamba ‘neno la Yehova linadumu milele’ na yanatueleza jinsi anavyohakikisha habari njema inawafikia watu wa aina zote.”​—1 Petro 1:25.