Agosti 14, 2023, Mashahidi wa Yehova walifungua maonyesho kwa ajili ya wageni katika ofisi ya tawi ya Jamhuri ya Dominika iliyo Santo Domingo. Maonyesho hayo yanazungumzia mambo ya kihistoria na yana kichwa “Safari Iliyofanikiwa kwa Sababu ya Imani.” Yanahusu jinsi Mashahidi wa Yehova katika Jamhuri ya Dominika walivyomtumikia Yehova kwa shangwe licha ya mateso na majaribu mbalimbali kama tu ndugu na dada wengine katika sehemu tofauti-tofauti ulimwenguni wanavyofanya.

Maonyesho hayo yanaanza kwa historia ya Mashahidi wa Yehova nchini humo. Yanaonyesha jinsi walivyoanza kutangaza ujumbe wa Ufalme kwa kutumia gramafoni na machapisho yanayotegemea Biblia. Pia, yanaeleza jinsi redio na magazeti yalivyotumiwa ili kuhakikisha kweli inawafikia watu wengi zaidi. Vilevile, wageni wana fursa ya kujifunza mengi kuhusu kazi iliyofanywa na wamishonari wa kwanza waliofika Jamhuri ya Dominika mwaka wa 1945.

Kwa kuongezea, maonyesho hayo yanaeleza jinsi Mashahidi wa Yehova walivyoendelea kuhubiri hata kulipokuwa na marafuku nchini humo. Licha ya upinzani mkubwa, kwa ujasiri ndugu na dada zetu walinakili na kusambaza machapisho. Katika kipindi hicho kulikuwa na ongezeko kubwa la wahubiri. Maonyesho hayo yanamalizia kwa kuonyesha jinsi kazi ya kuhubiri inavyofanywa sasa na ndugu na dada nchini humo kutia ndani mbinu mbalimbali wanazotumia.

Ndugu Leonel Peguero, ambaye hutumikia katika ofisi ya tawi ya Dominika alisema: “Kwenye maonyesho haya, wageni wanaweza kujifunza kuhusu mambo yaliyotokea zamani na yale yanayotokea sasa wanapotazama picha, vifaa halisi vilivyokuwa vikitumiwa, na pia kupitia rekodi za kusikiliza na video. Mtu anaweza kuhisi kana kwamba yupo kihalisi katika kipindi hicho na hilo linamsaidia kuelewa jinsi msingi wa kazi tunayofanya leo ulivyowekwa miaka mingi iliyopita. Tunawakaribisha wote wanaoweza kutembelea maonyesho haya wajionee wenyewe.”