JULAI 18, 2019
ITALIA
Mahakama Kuu ya Italia Yalinda Haki ya Mashahidi wa Yehova ya Kupata Matibabu
Mei 15, 2019, Mahakama Kuu ya Italia, mahakama ya juu zaidi nchini, ilikazia haki ya ndugu zetu ya kujiamulia wenyewe juu ya matibabu wanayotaka. Mahakama hiyo ilithibitisha kwamba mgonjwa ana haki ya kujichagulia mwakilishi wake wa kitiba ambaye atatetea uamuzi wa mgonjwa wa kukataa kutiwa damu mishipani. Isitoshe, Mahakama hiyo ilisema kwamba sheria ya Italia inamruhusu mtu kuchagua mwakilishi wa kitiba atakayesimamia matibabu yake, na hilo linatia ndani pindi mgonjwa anaweza kupoteza fahamu ghafla au ikiwa afya yake inaweza kudhoofika kwa njia fulani.
Ndugu na Dada Cappelli
Uamuzi huo ulitolewa baada ya kusikilizwa kwa kesi kadhaa za Ndugu Luca Cappelli, ambaye ni mzee wa kutaniko. Amekuwa akisumbuliwa na ugonjwa mbaya unaoathiri neva za ubongo kwa miaka 25. Ndugu Cappelli anahitaji kutumia mbinu tofauti tofauti za matibabu na hata wakati mwingine tatizo hilo linaathiri uwezo wake wa kuwasiliana na watu. Kabla ya kuanza matibabu yake, alijaza kadi ya Uwakilishi wa Kitiba kwa kutegemea dhamiri yake, kisha akamchagua mke wake, Francesca, awe mwakilishi wake wa kitiba. Hata hivyo, hakimu na mahakama ya rufaa ilikataa kumteua mke wake kuwa mwakilishi wake wa kitiba, na hivyo kumnyima Ndugu Cappelli njia ya kujilinda kisheria ili asitiwe damu mishipani, jambo ambalo ni kinyume na mapenzi yake.
Kesi ya Ndugu Cappelli ilifika Mahakama Kuu ya Italia mnamo Februari 16, 2017. Mahakama Kuu ilikanusha uamuzi wa mahakama za chini zilizokiuka Katiba ya Italia na pia Mkataba wa Ulaya wa Haki za Kibinadamu zinazolinda haki ya mgonjwa kujiamulia mwenyewe. Jambo la kufurahisha ni kwamba Mahakama ilieleza kwamba kukataa matibabu fulani “kunahusisha hisia nyingi ambazo zinapaswa kulindwa kwa njia ya pekee, hasa ikiwa kukataa huko kunahusiana na imani ya kidini.” Kulingana na maamuzi haya ya Mahakama Kuu, mahakama za Italia zimesihiwa ziheshimu tahadhari ambazo ndugu zetu hufanya ili kuepuka kutiwa damu mishipani.
Familia yetu nzima yenye umoja inafurahi kwamba Mahakama Kuu imeamua kulinda haki za ndugu zetu wote nchini Italia, ambao wanaendelea kutii dhamiri zao zilizozoezwa na Biblia kuhusu matumizi ya damu.—Mdo 15:29.
Huenda Ukapenda Pia
TAARIFA ZA HABARI
Madaktari Katika Makongamano Mawili Makubwa ya Kitiba Nchini Italia Wapendezwa na Matibabu Yasiyohusisha Damu
Matukio hayo mawili yaliandaa fursa za kutoa habari za karibuni zaidi za matibabu yasiyohusisha damu kwa wataalamu wa kitiba. Pia, baadhi ya madaktari wa upasuaji na wa nusu-kaputi walieleza maoni yao kuhusu kushughulika na Mashahidi wa Yehova.
TAARIFA ZA HABARI
Mahakama Jijini Sicily Yathibitisha Haki ya Kujiamulia ya Wagonjwa Mashahidi wa Yehova
Huo ni uamuzi wa kwanza katika mahakama ya Italia ambao umemhukumu daktari kwa uhalifu kwa sababu ya kuvunja haki ya msingi ya mgonjwa kuamua jinsi mwili wake utakavyotibiwa kupatana na imani yake.
TAARIFA ZA HABARI
Chuo Kikuu cha Padua Kimefanya Kongamano la Kihistoria la Kuzungumzia Maendeleo ya Matibabu Yasiyohusisha Damu
Kwa muda fulani, ilionekana kwamba kumtia mgonjwa damu mishipani hakuna madhara yoyote na ndiyo mbinu inayoweza kuokoa uhai wakati wa matatizo makubwa ya kiafya au wakati wa upasuaji tata. Lakini wasemaji wengi katika kongamano hilo walipinga wazo hilo.
TAARIFA ZA HABARI
Mahojiano na Profesa Massimo P. Franchi
“Ninathamini kwamba nimekutana na Mashahidi wa Yehova katika taaluma yangu. Wamenifanya mimi nikiwa daktari anayetumia mbinu za kawaida za tiba, kuanza kuchunguza uwezekano na umuhimu wa kupunguza matumizi ya damu.”