Aprili 23 hadi 26, 2025, inatimiza miaka 100 tangu kusanyiko la kwanza la Mashahidi wa Yehova lilipofanywa nchini Italia. Ndugu na dada walikutana kwa ajili ya sherehe ya harusi na wakafanya kusanyiko pia. Walifanya kusanyiko katika harusi hiyo ili kuepuka kuzuiwa na wenye mamlaka. Zaidi ya ndugu na dada 60 kutoka Italia na Uswisi walihudhuria kusanyiko hilo, na watu 10 hivi walibatizwa.

Wakati huo, serikali ya Italia ilikuwa ikichunguza kwa makini utendaji wa Mashahidi wa Yehova kwa sababu ya msimamo wao wa kutounga mkono upande wowote na kutojiunga na jeshi. Hivyo, Mashahidi hawangepewa vibali vya kufanya makusanyiko, na ikiwa wangekutana wakiwa kikundi kikubwa, wangesumbuliwa na wenye mamlaka. Hata hivyo, fursa ya pekee ilitokea Ndugu Remigio Cuminetti alipotangaza kwamba anataka kufunga ndoa na Dada Albina Protti. Ndugu waliokuwa wakiongoza walitambua kwamba wangeweza kufanya kusanyiko katika harusi hiyo bila wenye mamlaka kushuku kilichokuwa kikiendelea. Walikodi chumba kikubwa katika hoteli iliyoitwa Corona Grossa kwenye mji wa Pinerolo na wakatumia pindi hiyo ya harusi kufanya kusanyiko la siku nne.

Ndugu Remigio alimwandikia Ndugu Joseph F. Rutherford barua iliyoeleza jinsi programu hiyo ilivyowagusa moyo wote waliohudhuria. Alisema hivi: “Kwa pamoja, wahudhuriaji walimwahidi Yehova tena kwamba watakuwa waaminifu kwake, kwa Yesu Kristo, na kwa ile kweli.” Dada Adele Brun, dada wa kimwili wa bibi harusi, anakumbuka jinsi kusanyiko hilo lilivyokuwa pindi yenye “kuchangamsha, yenye baraka tele, na yenye shangwe.” Aliendelea kusema hivi: “Kila kitu kilikuwa kimepangwa vizuri . . . Sote tulikuwa na furaha na tulikuwa tayari kusaidia. Huo ulikuwa ushahidi mkubwa.”

Kusanyiko lililofuata la Mashahidi wa Yehova nchini Italia lilifanyika miaka 22 baadaye, katika mwaka wa 1947. Ndugu Roberto Franceschetti, mshiriki wa Halmashauri ya Tawi ya Italia, alisema hivi: “Tangu kusanyiko hilo la 1925, idadi ya Mashahidi wa Yehova imeongezeka sana. Mwaka wa 2024, watu 247,000 hivi walihudhuria Makusanyiko 70 ya Eneo ya ‘Tangaza Habari Njema!’ yaliyofanywa nchini Italia. Programu za kusanyiko hilo zilifanywa katika lugha 15 na watu 1,905 walibatizwa. Tunamshukuru sana Yehova kwa sababu ya ongezeko hilo.”

Kama Mashahidi wa Yehova wa nyakati zilizopita, ndugu na dada zetu leo wanampenda Yehova na wako tayari kuendelea kumtumikia. Nasi pia tunafurahi kuendelea kutangaza sifa za Yehova kutoka “kizazi mpaka kizazi.”​—Zaburi 79:13.