Kama ilivyo katika nchi nyingi leo, Italia inatambua haki ya wananchi wake kukataa utumishi wa kijeshi kwa sababu ya dhamiri. Lakini haikuwa hivyo sikuzote. Nchi hiyo ilikubali kuwe na haki hii baada ya Mashahidi wengi wa Yehova kujidhabihu kwa njia kubwa.

Kwa miaka mingi baada ya Vita vya Pili vya Ulimwengu, sheria ya Italia ilisema kwamba wanaume wanapaswa kwenda jeshini. Katika mwaka 1946, muda mfupi tu baada ya vita, kulikuwa na Mashahidi 120 nchini kote. Lakini kadiri watu waliojiweka wakfu kwa Yehova walivyoongezeka, idadi ya vijana Mashahidi ambao waliokataa kujiunga na jeshi kwa sababu ya dhamiri iliendelea kuongezeka. Maamuzi yao yalitegemea kanuni za Biblia kuhusu kudumisha msimamo wa kutounga mkono upande wowote, kuepuka ukatili, na kumpenda jirani.

Uchunguzi wa karibuni uliofanywa na ofisi ya tawi ya Italia ulionyesha kwamba kuna ndugu 14,180 walio hai ambao walihukumiwa kufungwa gerezani kwa kukataa kujiunga na jeshi. Jumla ya miaka ambayo ndugu hao walihukumiwa gerezani ilikuwa 9,732, hasa mwishoni mwa kati ya miaka ya 1960 na mwishoni mwa 1990.

Sergio Albesano, mwanahistoria ambaye anapinga kuwepo kwa jeshi anayeishi Turin, Italia, alisema kwamba Mashahidi wa Yehova ndio waliokuwa “wengi zaidi kati ya vijana waliokataa kujiunga na jeshi.” Pia, alisema kwamba kwa sababu ya usadikisho wao imara, vijana hao “walisaidia jamii kutambua tatizo hilo.”

Waziri Mkuu wa awali, Giulio Andreotti, ambaye alikuwa waziri wa ulinzi katika miaka ya 1960, aliamua kukutana na baadhi ya Mashahidi waliofungwa wakati huo ili kujua sababu zilizowafanya kukataa utumishi wa kijeshi. Aliandika hivi baadaye: “Nilivutiwa na jinsi walivyokuwa na msimamo thabiti kuhusu mambo waliyoamini na kukataa kujihusisha na siasa; hawakuamua ghafla tu kwamba wangekataa kujiunga na jeshi, na waliweza kuvumilia maisha gerezani kwa miaka mingi, huku wakikataa kabisa kuvaa sare.”

Sheria ya kwanza iliyotambua kwamba raia wana haki ya kukataa utumishi wa kijeshi ilipitishwa mwaka 1972. Kwa kusikitisha, ingawa sheria hiyo ilianzisha utumishi wa badala wa kiraia, utumishi huo ulisimamiwa na jeshi, jambo ambalo halikuwa sawa machoni pa ndugu zetu.

Hatimaye, Julai 8, 1998, serikali ya Italia ilipitisha sheria mpya ambayo iliondoa mamlaka ya jeshi juu ya utumishi badala wa kiraia, na hivyo Mashahidi wa Yehova wangeweza kufanya utumishi huo. Agosti 2004, nchi ya Italia ilipitisha sheria ambayo ilisema kwamba wanaume hawatalazimishwa tena kwenda jeshini kuanzia Januari 2005.

Miongoni mwa wataalamu wengi wanaoamini kwamba Mashahidi wa Yehova ndio waliosababisha sheria ya Italia ibadilishwe ni Sergio Lariccia ambaye ni wakili na mwalimu wa sheria katika Chuo Kikuu cha Sapienza jijini Rome. Alisema hivi: “Wakati ambapo makasisi wa jeshi walisema kukataa utumishi wa kijeshi ni ‘kuidhalilisha nchi ya mtu, na ni uamuzi ambao haukuwa na uhusiano kabisa na amri ya upendo wa Kikristo, na pia waliiona kama ishara ya woga,’ msimamo wa Mashahidi wengi wa Yehova ulichangia kubadilishwa kwa sheria na mtazamo wa jamii nchini Italia.”

Msimamo wa ndugu zetu haukuathiri mfumo wa kisheria tu katika nchi hiyo. Baadhi ya walinzi wa gerezani waliamua kuwa Mashahidi wa Yehova baada ya kuona mwenendo wa Mashahidi waliokuwa wamefungwa. Mmoja wao, anayeitwa Giuseppe Serra, anasema hivi: “Mfano wa vijana hao Mashahidi ulinichochea . . . kuanza kujifunza Biblia.” Akawa Shahidi mwaka 1972. (Tazama sanduku hapa chini.)

Tunashangilia kwa sababu ya ujasiri ambao ndugu zetu nchini Italia pamoja na familia zao walionyesha muda wote huo. Wao pamoja na ndugu wengine wengi ulimwenguni pote, wamechukua kwa uzito amri ya ‘kutojifunza vita tena kamwe.’—Isaya 2:4.