Septemba 1, 2022, itakuwa miaka 75 tangu toleo la kwanza la Mnara wa Mlinzi kutolewa katika Kitagalog kwa mara ya kwanza. Kuanzia wakati huo, idadi ya magazeti yaliyochapishwa katika toleo moja yaliongezeka kutoka nakala 600 hivi hadi zaidi ya nakala milioni 1.2 hivi. Pia gazeti hilo linapatikana katika mfumo wa kielektroni kwenye tovuti ya jw.org.

Habari njema ilifika nchini Filipino mapema mwaka wa 1908. Baada ya ofisi ya tawi kuanzishwa mwaka wa 1924, kazi ya kuhubiri ilipangwa vizuri zaidi. Machapisho ya Kiingereza ndiyo hasa yalitumiwa katika huduma, lakini akina ndugu waliona kuna uhitaji wa kutafsiri machapisho katika Kitagalog.

Juni 14, 1947, baada ya vita vya pili vya ulimwengu, Ndugu Earl Stewart, Ndugu Victor White, na Ndugu Lorenzo Alpiche, wamishonari waliozoezwa katika shule ya Gileadi, walifika nchini Filipino. Ndugu Stewart, ambaye aliwekwa rasmi kuwa mtumishi mpya wa ofisi ya tawi, aliwapanga upesi akina ndugu wanaostahili waanze kutafsiri gazeti Mnara wa Mlinzi katika Kitagalog. Kufikia Septemba mwaka huo, wahubiri walifaulu kusambaza matoleo mawili kwa mwezi ya Mnara wa Mlinzi.

Watafsiri wengi wakati huo walikuwa wakifanya kazi ya kimwili wakati wa mchana ili kutegemeza familia zao na kufanya kazi ya kutafsiri wakati wa usiku. Ndugu Hilarion Amores, mmoja wa watafsiri hao anasema hivi: “Tulilazimika kufanya kazi hadi saa nane usiku. Lakini tulifurahi sana kwa sababu tulikuwa tukifanya kazi ya kuwatunza ndugu zetu kiroho.”

Sasa, kuna wahubiri 97,443 katika makutaniko 1,126 ya Kitagalog nchini Filipino. Karibu watu milioni 76.5 wanazungumza lugha ya Tagalog nchini Filipino na zaidi ya wahubiri 115,000 wanaozungumza lugha hiyo ulimwenguni pote. Machapisho ya Kitagalog yanasambazwa katika nchi nyingi ulimwenguni na yanasomwa wahubiri na watu wanaopendezwa ulimwenguni pote.

Tunamshukuru sana Yehova kwamba kupitia tengenezo lake anaandaa chakula cha kiroho kwa ajili ya mamilioni ya watu ulimwenguni pote katika lugha yao ya asili.​—Mathayo 24:45, 46.