Kiswahili
Mwaka Mmoja Umepita Tangu Eritrea Ilipowafunga Gerezani Isivyo Haki Dada Wawili Wenye Umri wa Zaidi ya Miaka 80
https://cms-imgp.jw-cdn.org/img/p/702025146/univ/art/702025146_univ_sqr_xl.jpg

SEPTEMBA 8, 2025
ERITREA

Kushoto kwenda kulia: Dada Berekti Habte, mwenye umri wa miaka 84, na Dada Letebrhan Tesfay, mwenye umri wa miaka 86

Mwaka Mmoja Umepita Tangu Eritrea Ilipowafunga Gerezani Isivyo Haki Dada Wawili Wenye Umri wa Zaidi ya Miaka 80

Mashahidi Kumi na Wanne Wenye Umri wa Zaidi ya Miaka 60 Wako Gerezani

Mwaka Mmoja Umepita Tangu Eritrea Ilipowafunga Gerezani Isivyo Haki Dada Wawili Wenye Umri wa Zaidi ya Miaka 80

Septemba 2025 inatimiza mwaka mmoja tangu dada wawili wenye umri mkubwa walipofungwa gerezani isivyo haki nchini Eritrea. Septemba 27, 2024, Dada Berekti Habte, mwenye umri wa miaka 84, alikamatwa katika msako uliofanywa nyumbani kwa Dada Letebrhan Tesfay, mwenye umri wa miaka 86. Mkutano wenye amani wa Mashahidi wa Yehova ulikuwa ukiendelea kwa Dada Letebrhan msako huo ulipofanywa. Siku tatu baadaye, wenye mamlaka walirudi na kumkamata Letebrhan. Kwa sasa, dada hao wawili wamefungwa katika Gereza la Adi Abeto.

Dada hao wawili wamemtumikia Yehova kwa miaka mingi. Dada Berekti alibatizwa na kuwa Shahidi wa Yehova mwaka wa 1974. Amemtumikia Yehova kwa uaminifu kwa miaka 50 hivi. Dada Letebrhan alibatizwa mwaka wa 1957, na ni kati ya Mashahidi wa kwanza wa Yehova nchini Eritrea. Isitoshe, nane kati ya watoto wa Letebrhan ni Mashahidi wa Yehova. Mmoja wa watoto hao ni Dada Hadassa Zerisenay, mwenye umri wa miaka 52. Hadassa alikamatwa pia katika msako huo uliofanywa Septemba 2024 na amefungwa katika Gereza la Mai Serwa.

Dada Sidon Tekeste, mwenye umri wa miaka 17, ndiye Shahidi mwenye umri mdogo zaidi aliyefungwa nchini Eritrea

Kwa sasa, kuna Mashahidi 64 wa Yehova waliofungwa gerezani nchini Eritrea. Mashahidi 14 kati yao wana umri wa zaidi ya miaka 60. Dada Sidon Tekeste, ndiye Shahidi mwenye umri mdogo zaidi aliyefungwa. Ana umri wa miaka 17 na amefungwa katika Gereza la Mai Serwa tangu Novemba 2024. Hakuna yeyote kati ya ndugu na dada hao aliyefikishwa mahakamani au kufunguliwa mashtaka. Mara nyingi walinzi wa gereza hilo hawawaruhusu Mashahidi kupata matibabu na pia wanawatendea kwa ukatili. Dada mmoja, aliyeachiliwa huru kutoka Gereza la Adi Abeto Januari 2025, alisema hivi kuhusu hali mbaya katika gereza hilo: “Hali ni mbaya sana katika gereza hilo. Wafungwa ni wengi sana. Wafungwa, kutia ndani ndugu na dada zetu wenye umri mkubwa, wana nafasi ndogo sana ya kulala ya sentimeta 40 hadi 60. Kwa hiyo, wanalazimika kulala kwa upande mmoja, na ni vigumu sana kugeukia upande mwingine. Mimi ninahisi kwamba walinzi wa gereza wanajaribu kuwalazimisha ndugu na dada zetu wenye umri mkubwa waache kumtumikia Yehova.”

Hali hizo mbaya na ukiukaji wa haki za kibinadamu nchini Eritrea umevuta uangalifu wa mashirika ya kimataifa yanayojulikana. Kwa mfano, Mei 2025, Katibu Maalumu wa Umoja wa Mataifa alipokuwa akizungumzia haki za kibinadamu nchini Eritrea aliihimiza serikali ya Eritrea “iwaachilie mara moja na bila masharti wote ambao wamefungwa gerezani kinyume na sheria bila kushtakiwa au kufikishwa mahakamani” na “iache kuwatesa watu kwa msingi wa imani yao ya kidini.” Hata hivyo, serikali ya Eritrea imekuwa ikipuuza maombi hayo na inaendelea kuwatesa vikali Mashahidi wa Yehova kwa sababu ya imani yao licha ya kwamba wao ni watu wenye amani.

Ndugu na dada 14 waaminifu wenye umri wa zaidi ya miaka 60 ambao wako gerezani nchini Eritrea. Safu ya juu, kushoto kwenda kulia: Berekti Habte, 84; Elen Goitom, 60; Genet Zeray, 67; Keseteberhan Negusse, 74; Hideat Gebrehiwet, 65; na Letebrhan Tesfay, 86. Safu ya chini, kushoto kwenda kulia: Tewoldemedhin Habtezion, 66; Saba Tekle, 66; Tareke Tesfamariam, 77; Tekle Yoab, 74, na mke wake, Kdisti Tesfamichael, 71; Tesfay Kiflay, 67; Tesfazion Gebremichael, 83; na Okba Amare, 62

Tukiwa undugu wa ulimwenguni pote, tunasali kwamba ndugu na dada zetu waliofungwa gerezani isivyo haki nchini Eritrea waachiliwe. Tuna uhakika kwamba wataendelea kuvumilia mateso haya makali kwa sababu ‘roho ya Mungu iko juu yao.’​—1 Petro 4:14.