Kati ya Januari 13 na Februari 11, 2024, wanamichezo kutoka kote barani Afrika walishiriki katika mashindano ya 34 ya Kombe la Mataifa ya Afrika. Timu kutoka mataifa mbalimbali ya bara la Afrika zilishiriki katika mashindano hayo ya kimataifa ya mpira wa miguu. Mashindano hayo yalifanyika nchini Côte d’Ivoire, na maelfu ya watu kutoka mataifa 24 walihudhuria. Wakati wa mashindano hayo, Mashahidi wa Yehova walishiriki kwa bidii katika kazi ya kuhubiri ili kushiriki ujumbe wa Biblia na watu waliohudhuria. Zaidi ya vigari 120 vya machapisho viliwekwa katika majiji matano makubwa ambako mashindano hayo yalifanyika.

Jijini Abidjan, kijana mmoja alikaribia kigari chetu cha machapisho naye alivutiwa na broshua yenye kichwa Mtu Fulani Umpendaye Anapokufa. Kijana huyo alieleza kwamba rafiki yake wa karibu alikuwa amekufa hivi karibuni. Baada ya ndugu zetu kumsomea andiko lenye kufariji la Yohana 5:28, 29, mwanamume huyo alitiwa moyo sana. Aliwaalika ndugu zetu wamtembelee nyumbani kwake ili kuendeleza mazungumzo.

Katika kisa kingine, ofisa wa polisi katika jiji la Anyama alikaribia kigari chetu cha machapisho. Aliwaeleza ndugu zetu kwamba alifurahia sana kusoma machapisho yetu yanayotegemea Biblia, hasa yaliyozungumzia uumbaji na chanzo cha uhai. Hata ingawa alisema kwamba ana shughuli nyingi, alitoa namba yake ya simu na akawaomba ndugu zetu wawasiliane naye.

Mwanamume mmoja aliwakaribia ndugu zetu waliokuwa kwenye kigari cha machapisho jijini Abidjan na kuwaambia kwamba alijifunza Biblia na Mashahidi wa Yehova alipokuwa mdogo lakini akapoteza mawasiliano na kutaniko. Kwa miaka kadhaa, amejionea kwamba kuna tofauti kubwa kati ya Mashahidi wa Yehova na dini nyingine. Jambo moja lililomvutia sana, ni amani na umoja ambao watu wa Yehova walifurahia wakati ambapo vikundi vingine vya watu viligawanyika kwa sababu ya vurugu za kisiasa. Mwanamume huyo aliomba funzo la Biblia, na ndugu zetu wanajifunza naye kwa ukawaida.

Tunashangilia kwamba ndugu na dada zetu nchini Côte d’Ivoire walipata fursa hii ya pekee ya kuwasaidia watu wa mataifa mengi kusikia “mambo makuu ya Mungu.”​—Matendo 2:11.