Kusanyiko la kwanza la Pekee la 2025 la “Ibada Safi” litafanywa katika Ukumbi wa Fexpocruz, jijini Santa Cruz, Bolivia, kuanzia Mei 9 hadi 11, 2025. Kusanyiko lingine la pekee litafanywa majuma mawili baadaye kwenye jiji hilohilo la Santa Cruz. Kuna makusanyiko 19 ya pekee ulimwenguni pote ambayo yamepangwa kwa ajili ya mwaka wa 2025 na mwanzoni mwa mwaka wa 2026. Makusanyiko haya makubwa yatafanywa kwenye mabara 6 na yatafanywa katika lugha 29, kutia ndani lugha 7 za ishara.

Mipango na kazi nyingi zilihitaji kufanywa mapema ili kuandaa chakula, mahali pa kulala, na usafiri, kwa ajili ya wajumbe 4,000 ambao walitarajiwa kuhudhuria makusanyiko hayo. Matayarisho kwa ajili ya makusanyiko hayo mawili jijini Santa Cruz yalianza Septemba 2023. Ndugu na dada 7,000 hivi kutoka sehemu mbalimbali za Bolivia walijitolea kufanya matayarisho hayo. Ndugu Caleb Loyola, mshiriki wa Halmashauri ya Tawi ya Kolombia, alisema hivi: “Lilikuwa jambo lenye kusisimua na lenye kutia moyo kuwaona ndugu na dada wengi, wakikubali haraka mwito wa kujitolea. Ingawa walikuwa na kazi zao za kimwili, familia, na majukumu mengine, bado waliuliza, ‘Tunaweza kusaidia kwa njia gani?’”

Kunapokuwa na kusanyiko la pekee, wajumbe hupata fursa ya kuhubiri pamoja na ndugu na dada wenyeji. Jambo hilo linasisimua sana. Kwa mfano, Kristen, dada kutoka Marekani, alisema: “Sikuzote nimetamani kuhubiri katika nchi nyingine kwa sababu sijawahi kufanya hivyo. Sasa nitapata fursa hiyo na wakati huohuo itakuwa nafasi ya kuwafahamu ndugu na dada zangu nchini Bolivia. Nina uhakika kwamba kuhudhuria kusanyiko hili kutabadili maisha yangu!”

Tuna uhakika kwamba mamia ya makusanyiko ya eneo yatakayofanywa ulimwenguni pote, pamoja na Makusanyiko ya Pekee ya 2025 ya “Ibada Safi” yataimarisha imani yetu katika Yehova na kuongeza umoja wetu tukiwa watu wake.​—Zaburi 133:1.