Julai 5, 2025, serikali ya Belarus iliwasajili kisheria Mashahidi wa Yehova kwa mara ya pili. Mashahidi wa Yehova walisajiliwa kwa mara ya kwanza nchini Belarus mwaka wa 1994. Hata hivyo, sheria mpya iliyotungwa mwaka wa 2024 ilisema kwamba mashirika yote ya kidini yanapaswa kusajiliwa tena.

Pavel Yadlouski, msemaji wa Mashahidi wa Yehova nchini Belarus, alisema hivi: “Mojawapo ya mambo muhimu yanayohitajika ili kuwa na uhuru wa ibada ni kusajiliwa kisheria. Kwa mfano, kusajiliwa kisheria kunatuwezesha kufanya mikutano kwenye Majumba ya Ufalme au kwenye sehemu zilizokodiwa, kufanya makusanyiko, na kuingiza machapisho ndani ya nchi. Tulipokuwa tukifuatilia usajili huu, tulipata fursa ya kukutana na maofisa wengi wa serikali na kuwasaidia kuelewa vizuri zaidi Mashahidi wa Yehova ni akina nani na tuna mchango gani katika jamii. Mashahidi wa Yehova wamekuwepo nchini Belarus tangu mwaka wa 1924. Kusajiliwa kisheria kunaonyesha kwamba wenye mamlaka wanajua sisi ni raia wenye amani na wanaotii sheria na kwamba tunawafanyia wengine mambo mazuri. Tunawashukuru wenye mamlaka kwa kuruhusu tusajiliwe tena kisheria!”

Katika kipindi hicho chote cha kufuatilia usajili, ndugu na dada zetu nchini Belarus walifuata ushauri huu ambao mtume Paulo alitoa kwenye 1 Timotheo 2:1, 2: “Ninahimiza kwamba dua, shukrani, sala, na maombi yatolewe kwa ajili ya watu wa namna zote, kutia ndani wafalme na wote wenye vyeo vya juu, ili tuendelee kuishi kwa amani na utulivu na ujitoaji-kimungu kamili na kuchukua mambo kwa uzito.”

Tukiwa undugu wa ulimwenguni pote, tunamshukuru sana Yehova kwa kuwapa ndugu na dada zetu nchini Belarus “nyakati zinazofaa” wanapoendelea kumsifu na kulitukuza jina lake.​—2 Timotheo 4:2.