Siga a kui

Siga masenɲie radunkexi tode

Siga a suratunyi radunkexi

Yehowah xa Seedee

Soso xui

Wo wo xa die raxaran

 XARANSE 5

Samuweli nu fe tinxinxi na rabama

Samuweli nu fe tinxinxi na rabama

Kabi a to nu na sagatala ra, a nu sabatixi Ala xa hɔrɔmɔbanxi nan kui, a man nu walima naa nɛ. Yire nan nu naa ra mixie nu fama dɛn naxɛ Yehowah batude. I a kolon Samuweli nanse raba alako a xa lu hɔrɔmɔbanxi kui ? Won kata a n ga singe kolonde e nu naxan ma Hannah.

A nu bara bu Hannah mu nu nɔma di sɔtɔde, hali a to nu wama di xɔnma. A naxa Yehowah maxandi alako na xa a mali. A naxa laayidi tongo a, xa a di xamɛ sɔtɔ, a xaninma nɛ Ala xa hɔrɔmɔbanxi kui a xa luna, alako a xa wali naa. Yehowah naxa a xa sali yaabi : a naxa di xamɛ bari. A naxa a xili sa Samuweli. Alo Hannah a fala ki naxɛ, Samuweli to ɲɛ saxan xa na mu a ra ɲɛ naani sɔtɔ, a naxa a xanin hɔrɔmɔbanxi kui alako a xa wali naa.

Eli nan nu na pirɛti xungbe ra hɔrɔmɔbanxi kui, a xa di firinɲie fan nu walima naa nɛ. I ratu, naxee nu Ala batuma na hɔrɔmɔbanxi kui, nu lanma e xa fe fanɲi nan raba. Kɔnɔ Eli xa die nu fe kobie nan rabama. Samuweli e xa fe kobie to nɛ. Samuweli fe kobie raba nɛ alo Eli xa die ? — Ade, a tan nu katama fe fanɲi nan rabade, alo a xa forie a matinkan ki naxɛ.

I tan xa maɲɔxunɲi ma Eli nu lanma a xa nanse raba a xa di firinɲie ra ? — A nu lanma a xa e ɲaxankata a man nu lanma a xa tondi nee xa wali Ala xa hɔrɔmɔbanxi kui. Kɔnɔ Eli mu na sese raba, na ma, Yehowah naxa xɔnɔ a tan nu a xa die ma ki fanɲi ra. Yehowah naxa e ɲaxankata.

Samuweli Eli rakolonnɛ Yehowah xa masenɲi ra

Kɔɛ n de ra, Samuweli to nu xife, a naxa mixi n de xui ramɛ naxan nu na a xilife : « Samuweli ! » A naxa a gi a siga Eli yire, kɔnɔ Eli naxa a bɛ : « N mu i xilixi. » Na naxa raba han sambaya firin. A saxayande, Eli naxa a fala Samuweli bɛ a, xa a na xui man ramɛ, a nu nɔma a falade : « Wɔyɛn, Yehowah, n tuli matixi. » Samuweli na nan yati  raba. Yehowah naxa a fala Samuweli bɛ : « A fala Eli bɛ a n nan a ɲaxankatama nɛ a tan nun a xa denbaya e xa fe kobie xa fe ra. » I tan bɛ, fe xurudi nan nu na ki Samuweli bɛ a xa na masenɲi fala Eli bɛ ? — Ade, fe xurudi mu nu na ki. Kɔnɔ hali a to nu gaaxufe, Yehowah naxan fala a bɛ, a na nan yati raba. Yehowah xa wɔyɛnɲi naxa findi nɔndi ra. Eli xa di xamɛ firiɲee naxa faxa, Eli fan naxa faxa.

Samuweli findixi misaali fanɲi nan na won bɛ. Tinxintɔɛ nan nu a ra hali a to nu boree toma fe kobie rabafe. I tan go ? A xɔli i ma i xa lu alo Samuweli ? Xa i na raba, i Yehowah nun i xa forie raɲaxalinma nɛ.

YI XARAN I XA KITAABUI KUI

  • Samuweli I 2:22-26 ; 3:1-21, TMN