Siga a kui

Siga masenɲie radunkexi tode

Siga a suratunyi radunkexi

Yehowah xa Seedee

Soso xui

Wo wo xa die raxaran

 XARANSE 3

Raxabi la nɛ Yehowah ra

Raxabi la nɛ Yehowah ra

Won nan won maɲɔxun alo won naa Yeriko taa kui. Na taa naa Kanaan bɔxi nan ma, mɛnni mixie mu nu laxi Yehowah ra. Ginɛ n de nu sabatixi naa e nu naxan ma Raxabi.

Raxabi to nu na ginɛ dimɛdi ra, a taruxui gbegbe mɛ nɛ fatanfe Nabilaye Munsa xuluɲumi baa itaxun ki naxɛ alako Isirayilakae xa giri anun a Isirayilakae ramini ki naxɛ misira bɔxi kui. A man a mɛ nɛ fan a Yehowah Isirayilakae mali nɛ e xa nɔ sɔtɔ e yaxuie ra. Yakɔsi a bara a mɛ a Isirayilakae na Yeriko fɛ ma !

Raxabi yire rabɛnɲie kanta nɛ barima a nu laxi Yehowah ra

Kɔɛ n de, Isirayilaka firin naxa siga Yeriko rabɛnde. E naxa fa Raxabi xa banxi kui. A naxa e maxili e xa so a xɔɲi e xa dɔxɔ. Na kɔɛ, Yeriko mangɛ nu na Isirayilakae yire rabɛnɲie fenfe taa kui, na fe nan a niya e naxa so Raxabi xa banxi kui. Na kui mangɛ naxa mixie xɛɛ e xa na yire rabɛnɲie fen. Kɔnɔ Raxabi nu bara nee nɔxun a xa banxi fari, a naxa a fala mangɛ nun a xa mixie bɛ a : « Na yire rabɛnɲie nu na be, kɔnɔ e naa han ya taa kui. Xa wo siga ya kɔsi, wo nɔma e suxude ! » I a kolon munfe ra Raxabi naxa na yire rabɛnɲie kanta ? — Barima a nu laxi Yehowah ra, a man nu a kolon a Ala Kanaan bɔxi fima nɛ Isirayilakae ma.

Beenun na yire rabɛnɲie xa keli Raxabi xɔɲi, e laayidi tongo nɛ a, a tan nun a xa denbaya kisima nɛ Yeriko sɔntɔ tɛmui. I a kolon e naxan fala a bɛ a xa raba ? — E naxa a fala bɛ : « Yi luti gbeli suxu, a xiri tande i xa wundɛri dɛ. Xa i na raba, naxee birin na i xa banxi kui kisima nɛ. » Yire rabɛnɲie naxan fala Raxabi bɛ, a na nan yati raba. I a kolon nanse dangi na xanbi ? —

Yehowah Raxabi nun a xa denbaya rakisi nɛ

Lɔxɔ n dee to dangi, Isirayilakae naxa Yeriko tɛtɛ rabilin han xi senni, e nu na rabama sanbaya keren lɔxɔ yo lɔxɔ. Kɔnɔ xi solofere yande, e naxa taa rabilin sanbaya solofere, e to gɛ, e naxa gbele gbele. Yeriko tɛtɛ naxa bira a yɛtɛ ra. Kɔnɔ luti gbeli nu xirixi dɛn naxɛ, mɛnni  mu bira ! I nɔma yi pirinti matode ? — Raxabi nun a xa denbaya naxa kisi !

I nɔma nanse matinkade Raxabi xa fe ra ? — Raxabi nu laxi Yehowah ra barima a fe fanɲi gbegbe mɛ nɛ fatanfe Yehowah ra. I fan bara fe gbegbe mɛ fatanfe Yehowah ra. I laxi Ala ra alo Raxabi nu laxi a ra ki naxɛ ? — Muxu a kolon a i na rabama !

YI XARAN I XA KITAABUI KUI

  • Yosuwe 2:1-24 ; 6:1-5, 14, 15, 20-25, TMN

  • Eburu 11:31