Fetela boitsebisong

BACHA BAA BOTSA

Ke Hobane’ng ha ke se na Metsoalle?

Ke Hobane’ng ha ke se na Metsoalle?

U butse Inthanete ’me u shebile lifoto tsa ’moka o mong o sa tsoa feta. Metsoalle eohle ea hao e ne e le teng moo ’me e bonahala e ne e thabile haholo. Empa ho na le ntho e sieo. Ha e le hantle, ho na le motho ea sieo—ke uena!

U ka ’na ua ipotsa: ‘Ke hobane’ng ha ke ne ke sa mengoa?’

Tabatabelo ea hao e se e fetoha masoabi. U utloa eka ba u tsoiloe tlaase! Ekare metsoalle eohle ea hao u siile shalabeng. U ikutloa u apareloa ke bolutu, ’me ua ipotsa, ‘Ke hobane’ng ha ke se na metsoalle?’

 Tlhahlobo ea hore na u jeoa ke bolutu

’Nete kapa Bohata

  1. Ha u e-na le metsoalle e mengata, ha ho mohla u tla jeoa ke bolutu.

  2. Ha u e-na le metsoalle ea Inthaneteng, ha ho mohla u tla jeoa ke bolutu.

  3. Ha u lula u romela melaetsa ka fono, ha ho mohla u tla jeoa ke bolutu.

  4. Ha u etsetsa ba bang lintho, ha ho mohla u tla jeoa ke bolutu.

Karabo lipolelong tsena tse ’nè kaofela ke bohata.

Hobane’ng?

 Linnete mabapi le setsoalle le ho jeoa ke bolutu

  • Ho ba le metsoalle e mengata hase tiisetso ea hore ha ho mohla u tla jeoa ke bolutu.

    “’Na ke amehile ka metsoalle ea ka, empa ka linako tse ling ke bona eka eona ha e ntsotelle. U ka ikutloa u jeoa ke bolutu le ho feta haeba u e-na le metsoalle eo ho bonahalang eka ha e u rate kapa ha e u hloke.”—Anne.

  • Ho ba le metsoalle Inthaneteng hase tiisetso ea hore ha ho mohla u tla jeoa ke bolutu.

    “Batho ba bang ba ipokella metsoalle joalokaha eka ba bokella litšoantšo tsa limotlelara. Empa ho tlatsa kamore ka lintho tse ngata tse bokeletsoeng, le ka mohla ho ke ke ha etsa hore motho a thabe. Haeba ha u na metsoalle ea bohlokoa, ho etsa metsoalle ka Inthanete ho ke ke ha u tsoela molemo oa letho, feela joaloka litšoantšo tse sa pheleng tsa limotlelara.”—Elaine.

  • Ho lula u romela melaetsa ka fono hase tiisetso ea hore ha ho mohla u tla jeoa ke bolutu.

    “Ka linako tse ling ha u jeoa ke bolutu, u lula u sheba fono ea hao ho bona hore na ebe e mong oa metsoalle ea hao o u romeletse molaetsa. Haeba u se u ntse jeoa ke bolutu ’me u hlokomela hore ha ho na motho ea lekileng ho buisana le uena, seo se ka etsa hore u ikutloe u jeoa ke bolutu le ho feta!”—Serena.

  • Ho etsetsa ba bang lintho hase tiisetso ea hore ha ho mohla u tla jeoa ke bolutu.

    “Kamehla ke leka ho fa metsoalle ea ka lintho tse ngata, empa ke hlokometse hore eona ha e etse se tšoanang. Hase hore ke ikoahlaela ho ba fa lintho, empa kea makala hore ebe bona ha ba ntšoare ka tsela e mosa e tšoanang le eo ke ba tšoarang ka eona.”—Richard.

Ntlha ea bohlokoa: Ntlha ea pele, ho jeoa ke bolutu ke taba e amang kelello. Moroetsana ea bitsoang Jeanette o re: “Bo tsoa ka hare ho motho, eseng ka ntle.”

U ka etsa’ng haeba u utloa eka ha u na metsoalle ebile u jeoa ke bolutu?

 Kamoo u ka hlōlang bothata bona

Ikitlaelletse ho ba le boitšepo.

“Bolutu bo ka tsoaloa ke ho ikutloa u sa sireletseha. Ho thata hore u ikitlaelletse ho etsa setsoalle le ba bang haeba u na le boikutlo ba hore ha u tšoanelehe hore u ka ba motsoalle oa motho e mong.”—Jeanette.

Bibele e re: “U rate moahelani oa hao joalokaha u ithata.” (Bagalata 5:14) E le hore re be le setsoalle se molemo le ba bang, re lokela ho ikutloa re le ba bohlokoa ka tsela e itseng—empa re sa bontše boikhohomoso.Bagalata 6:3, 4.

Qoba ho ikhauhela.

“Bolutu bo tšoana le lehlabathe le tetebelang. Ha u ntse u tetebela ho bona haholoanyane, ho ba boima le ho feta hore u tsoe ho bona. Haeba u bo lumella hore bo laole monahano oa hao, kapele feela u tla ikutloa u se u ikhauhela hoo ho se nang motho ea ka batlang ho tsamaea le uena.”—Erin.

Bibele e re: “Lerato . . . ha le batle lithahasello tsa lona.” (1 Bakorinthe 13:4, 5) ’Nete ke hore ha re lula re inahana borōna feela, re haelloa ke qenehelo, ebe ka tsela eo ha re khahle batho ba bang hore e be metsoalle ea rōna. (2 Bakorinthe 12:15) ’Nete ke hore: Haeba katleho ea hao e itšetlehile ka hore na batho ba bang ba etsa’ng, u hlōleha ka ho feletseng! Bonneteng, lipolelo tse kang, “Le ka mohla, ha ho motho ea ntetsetsang” le “Ha ho motho ea keng a ’memele hore re ee kae kae” li etsa hore thabo ea hao e laoloe ke batho ba bang. Na seo ha se ba fe matla a feteletseng?

U se ke ua nka leha e le mang feela hore e be motsoalle oa hao.

“Batho ba jeoang ke bolutu ba batla ho fuoa tlhokomelo, ’me ba ka fihla boemong boo ba seng ba sa tsotelle hore ke mang ea ba fang tlhokomelo eo. Ba batla feela hore ba ikutloe e le ba bohlokoa. Empa batho ba bang ba tla etsa hore u ikutloe u le oa bohlokoa ebe ithuisa molemo ka uena. Joale u tla ikutloa u jeoa ke bolutu le ho feta.”—Brianne.

Bibele e re: “Ea tsamaeang le batho ba bohlale o tla hlalefa, empa ea bang le litšebelisano le ba hlokang kelello lintho li tla mo tsamaela hampe.” (Liproverbia 13:20) Motho ea lapileng a ka ja ntho leha e le efe feela. Ka tsela e tšoanang, batho ba lapetseng ho ba le metsoalle, ba ka e batla le libakeng tsohle tse fosahetseng. Ba ka iphumana ba oetse habonolo liatleng tsa batho ba ratang ho susumetsa ba bang hampe, ba nahana hore setsoalle se joalo ke se tloaelehileng ’me ba ke ke ba e-ba le se molemo ho feta seo.

Qetello: Motho e mong le e mong o jeoa ke bolutu ka linako tse ling; e mpa feela e le hore na bo mo ja hakae. Le hoja ho jeoa ke bolutu e le boikutlo bo bohloko, ’nete ke hore bo fela bo le joalo—ke boikutlo. Ka tloaelo tsela eo re ikutloang ka eona e laola ke seo re se nahanang, ’me re ka laola lintho tseo re li nahanang.

Ho feta moo, u se ke ua iphoufaletsa ’nete ka seo u se lebeletseng ho ba bang. Jeanette, eo ho qotsitsoeng mantsoe a hae pejana, o re: “Hase motho e mong le e mong eo e ka bang motsoalle oa hao ka ho sa feleng, empa u tla fumana batho ba u tsotellang. Hafeela motho a u tsotella, ho lekane. Seo se tla u thusa hore u se ke ua jeoa ke bolutu.”

Na u hloka thuso e eketsehileng? Bala sehlooho se reng “ Ho Hlōla Tšabo Mabapi le Setsoalle.” Hape kopitsa PDF ea “Ho Sebetsana le ho Jeoa ke Bolutu.”